Kêng măng 8/4, nthoi tay bôk nău rơh rƀŭn bôk năp, Quốc hội khóa 16, ăp đại biểu tâm nchră ta rmôt mpeh 3 nău nchrăp ƀư luật nkra rgâl geh: Luật Thủ đô, Luật tâm rlong, rnê nkhôm n’hanh Luật Tín ngưỡng, nchroh rƀŭn. Tâm nĕ, Nău nchrăp ƀư Luật Thủ đô (nkra rgâl) dơi mĭn lah khlay n’hao tâm pă gưl, nău dơi mkra lĕ rngôch an n’gâng kan ƀon lan Hà Nội, tĭng đah tŏng ăp prăk kaih, trong ƀư groi nđôi n’hanh lĕ đah nău kan mbơh rblang na nê̆. Ăp nău kơl rƀŏng tât dôh rklaih ăp ntŭk kol mpeh ntung trong, ntŭk ntô gŭ âm, nkual têh n’hanh rgŏ jă tơm prăk hun hao nâp nâl.

An rgop nău tâm Luật Thủ đô (nkra rgâl), Kruanh Quốc hội Trần Thanh Mẫn an gĭt, nuih n’hâm Luật rơh aơ an tâm pă gưl, tâm pă nău dơi mkra na nê̆, dŭt âk an n’gâng kan nkual ƀon têh Hà Nội tĭng nău way: Hà Nội ntrŭnh, Hà Nội ƀư, Hà Nội dơn uănh lĕ nău kan. Kruanh Quốc hội nkoch du đêt ntŭk ntoh lư bah dự thảo luật kơt: Pơk hvi nău way kơt dŏng pháp luật; ntop tay mô trok dơn lĕ nău kan pháp lý; ndâk njêng ntŭk kan hành chính wăng sa khlay; n’hao dơi mkra rmôt n’gâng kan an Hội đồng nhân dân nkual ƀon têh...