Nar 19/2, Quốc hội hop mpôch dŭt Rơh hop ndal tâl 9, Quốc hội khóa 15. Lor rnôk mpôch dŭt rơh hop, Quốc hội n’hơr ti uănh an dŏng 6 nghị quyết gay ntrŭt ntrôl hun hao wăng sa- rêh jêng kon nuĭh bah neh dak n’hanh ăp trong kơl mha êng đah du đêt trong nchrăp kan, ndơ ƀư khlay gưl neh dak.

Lah ta rnôk mpôch dŭt rơh hop, Kruanh Quốc hội Trần Thanh Mẫn an lah aơ lah n’gâng tơm khlay hăn tât rdâk njêng pháp luật, geh nkô̆ hôr dŭt khlay rhŏ dŏng rơh cách mạng dăp rgum, glêh tam nuĭh kan bah lam trong kan chính trị n’hanh ngăch droh rklaih jêr jŏt, kŏ kol mpeh trong tĭng, trong kơl, njêng đăt ndal gay ƀư ăp tŏng geh ndơ dŏng, ntik n’hao tơm ndơ, nta trong soih aih an hun hao mhe an n’gor n’hanh lam dak. Pah  kan nchrăp nuĭh kan hŏ dơi tĭng ƀư lhăt, tĭng di quy định bah Đảng, pháp luật Ngih dak, dơi geh ăp nău tâm ban ŭch, dơn ngoăy âk bah ăp nuĭh đại biểu Quốc hội. Kruanh Quốc hội Trần Thanh Mẫn dăn đă Chính phủ ntop kơl dŭt âk gay rdâk njêng ăp trong nchrăp, siƀŭt quy định na nê̆ nkô̆ dơi jao tâm ăp luật n’hanh nghị quyết bah Quốc hội; ăp nhih pah kan ndăn ra uănh tay gay rgâl nkra, kơi ntop du đêt nkô̆ tâm ăp siƀŭt quy phạm pháp luật geh tât dăp rgum nuĭh kan ân nkra ngăch dĭl, geh nău khlay mha êng, ma mô nkra tĭng nău way nsum gay n’gluh an dŏng tĭng n’glĕ nău dơi ƀư.