Tâm nău nchih "Leo ƀư uĕh Đại hội Đảng bộ ăp gưl năm kan 2025-2030", Tổng Bí thư Tô Lâm nkoch kloh nău mĭn: Nău nchrăp nuĭh kan mô dơn an du rơh đại hội; ma ngai lơn, nê lah nău nchrăp nuĭh kan an hun hao bah mpôl kan đảng, nău hun hao bah n’gâng kan, trong kan, n’gor, nhih pah kan, đơn vị let năp tay; hvi lơn, nê lah săk rêh bah Đảng, nău dâk nha bah trong tĭng n’hanh nău hun hao bah neh dak, bah rnoi nuĭh. Tổng Bí thư Tô Lâm êng njrăng đă uănh khlay nău dơn kan bah nuĭh mât bôk tâm nău dăn đă, mbơh nuĭh kan. Gưl ủy viên dơi sơch ân lah găr ntil kruanh rđău kan chính trị, lah ntơh măt an rmôt đảng viên n’hanh dơi nsum mpôl nsing nơm, dêh rŏng... Ăp nău ŭch geh bah nuĭh mât bôk Đảng he ndơ̆ luh tâm năm kan ân sơch cán bộ ntoh lư ngăn n’hanh an geh nuih n’hâm uĕh lŏng; geh nău gĭt blău ngăn rlău dơi ăp ntul rlong bah rơh mhe aƀaơ; tĭng ƀư nău dơn kan khlay ndơ neh dak lăp tâm rơh hun hao, ndrŏng dăng.  

Tâm nău nchih, Tổng Bí thư Tô Lâm êng uănh khlay tât nău nchrăp nuĭh kan Đại hội. Mpeh dăp rgum gưl ủy, ân đăp mpăn nău rđău đă na nê̆, lam lĕ rngôch bah gưl ủy đah ăp ntŭk, ăp trong kan khlay; uănh săk blău, mô njău ma geh dăp rgum ma njŭr rnoh di; mô kâp ăp n’gor, n’gâng kan ân geh  nuĭh râng gưl ủy da dê;gưl ủy viên dơi sơch ân lah găr ntil kruanh rđău kan chính trị, lah ntơh măt an rmôt đảng viên n’hanh dơi nsum mpôl nsing nơm dêh rŏng; ăp gưl ủy viên ân di lah nuĭh lăp kan nsum tâm “mpôl nsŏng kơl nău” lơh kan ngăn n’hanh ân tâm rnglăp, dơn ngoăy mpeh nău mĭn n’hanh nău dâk kan, kloh uĕh ngăn, nâp dăng, rôih sŏng. Tổng Bí thư Tô Lâm lah kloh:

"Ân nchrăp n’hanh ƀư an dŭt jăp uĕh Đại hội Đảng bộ ăp gưl hăn tât Đại hội tâl 14 bah Đảng, rgum  tơm  lah nsŏng kơl nchrăp sơch luh dơi nhih pah kan rđău kan bah Đảng ta ăp gưl geh suan dăng kan âk. Rgum nchrăp nuĭh kan gưl ủy nhiệm năm kan mhe tĭng di ăp nkô̆ hŏ dơi ntĭm nti".

Tâm du njăr trong cách mạng Việt Nam 95 năm aơ, đah 13 rơh Đại hội, Wa Hồ n’hanh Đảng he hŏ êng uănh khlay tât pah kan nchrăp nuĭh kan. Lôch ăp rơh đại hội, ta tĭng njăr trong cách mạng, Đảng he hŏ rdâk njêng rmôt cán bộ, rgop têh kuâng tât nău n’glêh an, njêng geh ăp nău dơi lịch sử, ndơ̆ neh dak hun hao. Yor kơt nê̆, tâm pah kan nchrăp Đại hội ta năm kan pah kan nchrăp nuĭh kan dơi uănh lah nkô̆ nău dŭt têh n’hanh dŭt khlay. Ăp quy định bah Đảng mpeh ăp rnoh di, rnoh nsing gay sơch cán bộ dơi quy định dŭt ngăn ngăn n’hanh na nê̆. Bol ma kơt nê, nău "sơch mhâm an di?” hôm way lah nău ôp jêr đŏng. Wa Vũ Văn Phúc, Tổng Biên tập Tạp chí Cộng sản ơm an lah:

"Ân uănh năl di n’hanh găl tĭng cán bộ gay n’glăp tâm săk Đại hội sơch gưl ủy khóa mhe, ăp đại biểu râng Đại hội ân mĭn uănh sơch na nê̆ ăp cán bộ geh han săk chính trị nâp dăng, nuih  n’hâm uĕh lŏng, geh nsing nơm, geh nău gĭt blău nti têh, geh nău dơi kan tŏng di đah neh dak ŭch geh lăp tâm rơh hun hao lhung jong săk bah rnoi nuĭh Việt Nam. Nău mhâm ƀư sơch an di, an găl cán bộ gưl ủy lah nău ôp têh dôl ndơ̆ luh đah nău dơn kan bah ủy ăp gưl n’hanh đảng viên lah đại biểu râng Đại hội Đảng bộ ăp gưl".

Tâm pah kan cán bộ n’gluh âk nău dơn kan bah nuĭh mât bôk rnôk dăn đă, mbơh săk nuĭh kan đŏng, lơn lah nuĭh nđơn tay năm kan tĭng ăp quy định mhe bah Trung ương. Nău nchâp đă nău dơn kan nuĭh n’hao đă ƀư ƀư cán bộ ân dơi tĭng ƀư n’hanh groi nđôi gay joi geh ngăn nuĭh cán bộ geh nuih n’hâm uĕh lŏng, geh nău gĭt blău lăp tâm nuĭh mât bôk kan ăp gưl ta Trung ương. Yor, tâm du mpôl, mô kâp di du rut tĭng nê kon nuĭh ndrel n’hơr ti nkoch mbơh du hê nuĭh, ma ân geh du hê nuĭh dăn đă, ntơm dâk leo. Nuĭh n’hao đă ƀư ân geh năm khay kan krêp dêh đah nuĭh dơi n’hao đă ƀư. Khân păng ân wât kloh nău dơi kan nău blău kan, nuih n’hâm uĕh lŏng bah nuĭh dơi đă n’hao ƀư mô di mbơh du trong lêng lang, dêh bên n’hanh uănh saơ bah lơ măt mô lah “rvăt nău têh nău kan” lôch  nê nduih nja an nsum mpôl. Tiến sỹ Vũ Dương Huân, tă ƀư Giám đốc Học viện Ngoại giao lah rjăp:

"Âk năm kan bah năp nơh hŏ n’hao đă cán bộ lôch kan mô tŏng đah nău ŭch dơi geh, mô dơn nê lăp tâm gŭk ndrung. Nuĭh n’hao đă ƀư dŭt khlay, n’hao đă di nuĭh ri geh cán bộ jăp blău, lah n’hao đă tih nuĭh ri khuch djơh an neh dak. Jêng ân geh nău dơn kan tâm nău n’hao đă ƀư cán bộ. N’hao nău dơn kan mô ji an ma săk nơm nuĭh nê ma an săk nuĭh n’hao đă nê hŏ an geh nău tih n’hao đă nuĭh kan mô di nău ŭch tŏng dơi nău kan".

Geh nău ngăn lah rnôk Đại hội, sơch tâm dăp rgum, êng nuĭh dơi sơch tâm gưl ủy kloh rsang, yơn hŏ lăn lăp ta ntŭk gŭ kan ri ntơm geh tâm pă nău dơi kan, nău geh, hưp rŏng drăp ndơ... jêng tât geh khuch djơh, rgâl nuih n’hâm djơh. Nău nê an saơ, nău sơch nuĭh kan mô dơi dơh, rêng nchrăp nuĭh kan ân tĭng ƀư lhăt jăp, ăp tŏng rêng, mbơh kloh rvah; sơch ăp nuĭh tŏng geh nuih n’hâm uĕh lŏng, nău gĭt blău, ntŭk nsing ăp tŏng gay râng tâm gưl ủy khóa mhe. Gưl ủy viên dơi sơch ân lah găr ntil kruanh rđău kan chính trị ngăn, lah nuĭh ntơh măt an rmôt đảng viên n’hanh dơi nsum mpôl nsing nơm, dêh rŏng. Wa Trần Ngọc Đường, Ủy viên Mpôl kruanh Ủy ban Trung ương MTTQ Việt Nam an gĭt:

"Ntŭk nsing dŭt n’hâm khlay lah ân “kloh rsang”. Mô “kloh rsang” ri mô n’glăp an tâm gưl ủy. Tổng Bí thư Tô Lâm hŏ lah rjăp mpeh nuih n’hâm uĕh lŏng, nău dơi ƀư, nuih n’hâm uĕh bah nuĭh dơi sơch râng ƀư tâm gưl ủy tâm năm kan tât. Rlău ma ăp ntŭk nsing mnpeh nuih n’hâm kloh uĕh mpeh chính trị, nău dơi kan, nău blău kan, nău gĭt blău nti têh ri ân uănh khlay mpeh nău uĕh “kloh rsang” đŏng.

Gay ƀư geh nău dơi Đại hội ăp gưl hăn tât Đại hội Đại biểu lam dak tâl 14 bah Đảng, pah kan nchrăp lor nuĭh kan ân dơi ƀư tĭng rêng lhăt jăp ngăn, khoa học n’hanh dơn ngoăy; der bah ƀư du trong dah rŏng, moh geh, baih ma lê, mô geh nău way, ndơm nuĭh groi nđôi hôch. Nkre, rdâng lơh ngăn ăp nuĭh mpơl nău hưp kan têh, rgŏ jă nuĭh, mpeh mpôl, nde tâm nău geh rmôt nơm, nău mĭn tĭng nău nŏng êng tĭng ntŭk, tĭng n’gor, dêh bên, tâm nkrum njâm... geh kơt nê mơ sơch dơi nuĭh geh nuih n’hâm uĕh lŏng ngăn; geh nău gĭt blău ngăn rlău dơi ntul rlong bah rơh mhe; tĭng ƀư nău dơn kan ndơ̆ neh dak lăp tâm rơh hun hao, ndrŏng dăng.