Kơp ntơm bah rnôk geh trong sol ang bah Đảng, Wa Hồ tât đah ƀon lan ăp rnoi mpôl đê̆ n’gor Kon Tum, 93 năm aơ nuĭh Xơ Đăng, Ba Na, Gié- Triêng, Gia Rai, Brâu, Rơ Măm n’hanh Hrê ta ntŭk dja  way hôm du nuih n’hâm nsing nơm dêh rŏng Đảng. ngăn an saơ gay mât nău nsing nơm ngăn, jŏ jong nâp dăng đah Đảng ri tâm ban kơt du rse brai gŭr sro rloh rlău, pah kan rdâk njêng Đảng ta nkual rnoi mpôl đê̆ n’gor Kon Tum way dơi ăp gưl ủy êng uănh khlay.  

Đah nău mha êng lah n’gor jêr  jŏt, âk mpưm nuĭh ƀon lan rnoi mpôl đê̆, ntơm bah năm 1994, rnôk n’gor Kon Tum dơi njêng nsing ta nău tăch luh bah n’gor Gia Lai- Kon Tum, tâm âk rduăl nău jêr jŏt, Tỉnh ủy Kon Tum geh nău ntrŭnh mbrô 10, lôch nê lah Nghị quyết 01 năm 1996, Nghị quyết 04 năm 2007 đah trong nchrăp rloh rlău lah ăp nhih pah kan tâm njêng rdâk njêng xã nkual rnoi mpôl đê̆, nkual wăng sa mhe dŭt jêr jŏt. Wa Ka Ba Tơ, Groi Bí thư Rnâng kan ơm Tỉnh ủy, Kruanh ơm HĐND n’gor Kon Tum an gĭt:  

“Ntơm bah nău ntrŭnh mbrô 10 tât Nghị quyết 01, Nghị quyết 04 geh rnoh khlay n’hanh dŭt geh nkô̆ khlay. Nghị quyết ƀư an cán bộ, đảng viên n’hanh ƀon lan rgum hun hao wăng sa- rêh jêng kon nuĭh du trong dăng n’hanh  nâp jong. Tâl bar lah rdâk njêng Đảng nâp dăng ƀư n’gâng tơm tâm ban kơt nău khlay kan hăn leo lor ban cán bộ, đảng viên gay têk ndrêng ƀon lan tĭng ƀư di ăp Nghị quyết bah Đảng, Ngih dak đŏng”.

Tĭng ƀư ăp nău ntrŭnh, Nghị quyết rƀŏng sĭt tâm dâng, rƀŏng mpeh nkual rnoi mpôl đê̆ dŭt jêr jŏt mha êng bah Tỉnh ủy Kon Tum, tâm ăp năm rlău aơ hŏ geh hang rmưn tơ̆ cán bộ đảng viên ăp gưl bah n’gor grêt dêh đah thôn, ƀon “Ndrel gŭ, ndrel kan”, djăt nău ŭch rŏng mpŏng geh bah nuĭh ƀon lan. Gưl ủy, đảng viên rƀŏng sĭt mpeh tâm dâng, mpeh rnoi mpôl đê̆ jêr jŏt gay mât chăm hun hao wăng sa-rêh jêng kon nuĭh, rgâl geh n’hao nău rêh an nuĭh ƀon lan. Wa Dương Văn Trang, Ủy viên Trung ương Đảng, Bí thư Tỉnh ủy, Kruanh HĐND n’gor Kon Tum lah rjăp:

“Hŏ ma cán bộ đảng viên ntop kơl rnăk ach o,  rnăk dăch kêng ach o, ƀon lan rnoi mpôl đê̆ sơch trong ntĭt leo, trong tuch tăm gay nsan hao klaih rlău ach o lah hăn tât mir ba n’hanh tĭng ƀư trong rƀŏng “Mih njâr lăp mbĕ jŏ” n’hanh “nhŭp ti nchŏng kan” rlăy kah nău mĭn rôih sŏng nsrôih êng klaih rlău ach o bah ƀon lan rnoi mpôl đê̆. Aơ lah ngoăy tâm ăp nău dơn kan chính trị khlay bah ăp cán bộ, đảng viên tâm dâng n’hanh ta ntŭk ƀon lan gŭ geh âk  nuĭh rnoi mpôl đê̆ rêh”.

Đah trong rƀŏng lah gay ƀon lan wât, ƀư gay ƀon lan nsing nơm, rup gui ăp nuĭh đảng viên lĕ nuih n’hâm tâm mât chăm ntĭm nti, dak si; ntĭm nti nuĭh ƀon lan ƀư gung trong ƀon lan, tăm tơm cao su, cà phê, n’gluh sŭr djăr, ndrôk rpu luh bah nâm rôm jay, tăm rơ̆ jêng tơm dak si… way bên đah tĭng nuĭh, tĭng ƀon lan, tĭng xã. Wa Trương Hồng Doanh, Bí thư Đảng ủy xã Đăk Kôi, nkuâl Kon Rẫy an gĭt, Đảng bộ xã geh 156 đảng viên, tâm nê đảng viên nuĭh rnoi mpôl đê̆ âk rlău 83%. Ăp đảng viên tâm xã way ntĭt leo lor n’hanh dơi ƀon lan nsing nơm:

“Ăp oh nô đảng viên ta aơ way ntik n’hao dơi trong leo chŏl lor ntĭt leo mha êng tâm nkô̆ nău mât đăp mpăn rnă njrăng, đăp mpăn lam rêh jêng kon nuĭh ta ntŭk. Ăp oh nô đảng viên bah ăp chi bộ ma lơn lah đảng viên nuĭh rnoi mpôl đê̆ way nkoch trêng, rgŏ jă nuĭh ƀon lan mô djăt, mô tĭng mô ƀư mpôl mhĭk djơh nsŭk nsôr. Xã aƀaơ mô hôm geh ăp nău way ơm rluk mâl. 451 rnăk ƀon lan rnoi mpôl đê̆ ach o, dăch kêng ach o dŏng geh nău tam ăp tơm ndơ bah rnăk wâl, tơm prăk manh gay hun hao wăng sa. Tât aƀaơ ăp rnăk rnoi mpôl đê̆ hun hao dŭt dăng”.

Ntơm bah nău nsum suan, du nuih n’hâm bah Đảng n’hanh ƀon lan, n’gor Kon Tum hŏ njŭr dơi rnoh âk rnăk ach o ntơm bah rlău 65% tât rnôk njêng tay n’gor năm 1991 jŭr hôm ta nâm 11% tâm kêng dŭt năm 2022. Ơm lôch jêh ăp rnoh tât lĕ rngôch ăp xã geh trong ndeh ô tô hăn tât nklang xã; săk blău ntĭm nti dơi n’hao; Nhih dak si ăp xã geh bác sỹ… Ndrel đah nê lah rdâk njêng dơi lam trong kan chính trị nâp dăng đah 14 Đảng bộ đah rlău 31.300 đảng viên. Wa Nguyễn Thanh Long, 76 năm deh, 56 năm đảng ta tổ 4, khối phố 3, thị trấn Đăk Tô, nkuâl Đăk Tô, an lah ngoăy tâm ăp nău dơi têh bah Đảng bộ n’gor Kon Tum lah hŏ ntĭm nti, rdâk njêng dơi rmôt cán bộ đảng viên nuĭh rnoi mpôl đê̆ ƀon tơm ta ntŭk:

“Rmôt cán bộ nuĭh ƀon tơm ta ntŭk aƀaơ bah n’gor jŭr tât nkuâl, tât xã bol mô hŏ tŏng lĕ rngôch đah nău ŭch geh cách mạng yơn bôk năp lah geh nău khlay khân păng mbra dâk ƀư tơm ta ntŭk khân păng rdâk njêng, khân păng rđău đă ƀon lan dơi hôm mô kâp Trung ương njŭr tât. Nău uĕh lah jâng rnă njrăng chính trị, đăp mpăn lam rêh jêng kon nuĭh”.

Đah aƀaơ rlău 2 năm Ban Thường vụ Tỉnh ủy Kon Tum rđău đă an ƀư tay Rơh rgŏ jă “Ƀư rgâl nău mĭn, nău kan bah nuĭh rnoi mpôl đê̆, ƀư an nuĭh rnoi mpôl đê̆ nsan hao klaih rlău ach o jŏ jong”. Lôch rlău 2 năm, lam n’gor Kon Tum geh rlău 6.100 rnăk klaih rlău ach o, hang rmưn rnăk nuĭh rnoi mpôl đê̆ ntlơi mbrơi ăp nău way ơm rluk mâl mô kâp nơm, nsing gư tay nsrôih nsan hao êng; gĭt dŏng khoa học kỹ thuật tâm nău kan tuch tăm; bơi 3.600 rnăk nuĭh rnoi mpôl đê̆ râng ăp rmôt tâm boh, hợp tác xã...Đah ƀon lan ăp nuĭh rnoi mpôl đê̆ ta n’gor Kon Tum, Đảng way dăch dêh, krêp dêh đah ƀon lan. Đảng viên mhe A Niêng, Chi bộ thôn Tu Krối, xã Đăk Kôi, nkuâl Kon Rẫy, an gĭt:

“Dơi dâk tâm rmôt bah đảng gâp dŭt rhơn n’hao êng. Săk gâp nơm mbra nsrôih dŭt n’hâm gay kơt nti, tâm ôp tâm rgâl. Gâp kơt nti moh ntil nău uĕh blău sĭt nđơn nkoch tay an kônh wa, kơl kônh wa ta thôn tuch tăm, mât rong kơl kônh wa klaih rlău ach o. mbơh nti kơl druh ndăm geh nău kan”.

Nău nsing nơm bah nuĭh Xơ Đăng, Ba Na, Gié- Triêng, Gia Rai, Brâu, Rơ Măm, Hrê ta n’gor Kon Tum đah Đảng, Wa Hồ hŏ dơi ntul rlong ma bar rơh tâm lơh tâm su lơh Prăng n’hanh mprơh Mỹ lăp pit in tŭn jot neh dak. Tâm njăr trong hăn jêng tât geh nău dơi ngăn ngăn ƀon lan geh ndrŏng, neh dak têh dăng, ƀon lan ƀư tơm, geh nău tâm ban, gĭt blău kloh rsang, Đảng bộ n’gor Kon Tum way geh nău ndrel hăn đah âk nău nsing nơm uĕh, nâp jong du nuih n’hâm đah Đảng bah nuĭh Xơ Đăng, Ba Na, Gié- Triêng, Gia Rai, Brâu, Rơ Măm n’hanh Hrê tâm ban kơt ăp rnoi mpôl đê̆ êng ƀa ƀă aƀaơ hŏ âk rlău 54% rnoh nuĭh bah n’gor./.