Ntoh nau tâm nar rƀŭn, rnâng kan Ban Bí thư Trần Cẩm Tú lah rjăp, năm 2025 lah năm geh nau khlay, lah năm lam Đảng, lam ƀon lan, tahen nơm nsôih hao, ƀư dơi ăp nkô̆ nau bah Đại hội 13 mbơh luh; năm ƀư Đại hội Đảng bộ ăp gưl rƀŏng tât Đại hội 13 bah Đảng; năm bôk năp ƀư nau dăp rgum ntrong kan chính trị gleh, pah kan nâp, săk tam, pơk trong gay neh dak lăp tâm rach năm hun hao mhe bah rnoi mpôl. Ndri ma, Rnâng kan Ban Bí thư pơk trong năm 2025 aơ, ntŭk kan Bonh đă ân ƀư rjăp nau ntrŭnh bah Kruanh Hồ Chí Minh, nau mĭn bah Đảng ndrel nau rđau bah Tổng Bí Thư Tô Lâm tâm nar pah kan mhe aơ bah nau kan bonh đă, ntŭk kan ân geh ndơn saơ nau khay ndrel nau đă mhe tâm nau bonh đă tâm ban nau kan tâm rnôk cách mạng mhe gay ƀư ueh n’hâm dăng ƀon lan, n’hâm soan tâm rnglăp rnoi mpôl, leo neh dak lăp ngăn tâm rach năm mhe.

            Rnâng kan Ban Bí thư đă, n’hao lơn tay nau ƀư nau ntrŭnh nau kan bah ntrong kan chính trị, ndrel nê, lŏ rgâl mhe nau kan bonh đă ƀon lan, mât tâm dăch nkuăl, ntŭk, mât nâp nau kan, pơk luh ăp ntrong, nau gĭt mhe, nau mĭn, nau ŭch ndrel nau đă bah nkô̆ “Ryơk ƀon lan, êp ƀon lan, gĭt ƀon lan, kơt tĭng ƀon lan, geh nau kan ma ƀon lan”. Rđau kan, nŭih dâk bôk ân geh ăp gưl ƀa ƀơ tâm mâp, tâm nchră, djăt, năn rklaih nau nkol tâm ƀon an, ngăn lah nau kan phong lah, mpŭng lir, sa khâm...Lŏ ƀư ueh nau kan bonh đă tâm nkuăl rnoi mpôl đê̆, nkuăl ƀon lan tĭng chroh, ăp nkuăl tơm mpeh nau đăp mpăn, neh dak, nkuăl jru, nkuăl ngai, nkuăl jêr jŏt, mât nâp nau geh bah kônh wa nơm tâm dak ba dih.

            Rnâng kan Ban Bí thư Trần Cẩm Tú đă, ntŭk kan bonh đă nsôih ntrŭnh ƀư nau kan gay ma kơl an nau kan Đại hội XIV bah Đảng, rgŏ jă rơh rƀŭn chính trị jru, bah năp, tâm ndrel ba kơi Đại hội, njêng nau kan rhơn, tâm rnglăp, n’hâm blau mhe tâm ƀon lan. Rnâng kan Ban Bí thư mbơh kloh, nau ntrŭnh tâm ban ngăn bah Ban Bí thư Trung ương ndrel Ban Tuyên giáo Trung ương lŏ ntrŭnh ƀư ndal, rjăp, đă nau kan dăp rgum, rtŭt gleh khoa học, đăp mpăn tâm di nau dơi, ndâk, ntrŭnh ƀư bôk nau kan năm 2025 jêh rnôk tâm rgum, tâm rnglăp:

‘Phung nơm ân geh rtŭt gleh nau ƀư nau kan hăn nsum đah nau ndâk tay rmôt cán bộ tŏng nau dơi, nau dăng geh nau rnơm tŏng dơi geh nau đă nau kan tâm rơh mhe. Ndri ma, ntŭk kan bonh đă ân geh ƀư ueh nau kan tâm Đảng, tâm Mặt trận ndrel ntŭk ƀư nau kan chính trị rêh jêng, tâm nê ntŭk kan bah Ngih dak ndrel N’gâng kan ăp gưl nkre tâm ntŭk kan bonh đă bah nơm, ân geh njêng nau tâm ban nuih n’hâm, tâm kơl an, ƀư nau kan gay ma nsôih prêh ngăn, rgop nau ƀư ueh nau kan dăp rgum ƀư ntrong kan bah nơm”.

 Djăt ăp nau đă mbơh tâm nau rđau đă bah Rnâng kan Ban Bí thư, Kruanh Rnâng kan bonh đă Trung ương Mai Văn Chính mbơh, năm 2025 ndrel rơh mhe lŏ djăt, lam ntŭk kan mra rgâl mhe ăp nkô̆, nau kan bonh đă ƀon lan tŏng dơi nau ŭch tâm rơh mhe. Ma nau tơm lah nau rgâl mhe nau nkoch trêng, bonh đă ƀon lan, ntrŭt dăng khoa học, công nghệ, ntrơn rgâl mrô tâm nau ntrŭnh ăp nau kan bonh đă:

 ‘Mpeh nau kan ntơm rnôk aơ tât Đại hội 14 bah Đảng hôm têh ngăn, tâm nê geh ăp nau jêr, ŭch Rnâng kan bonh đă Trung ương ndrel ntrong kan bonh đă ăp gưl ân nsôih âk lơn tay gay dơi nchrăp ân năn gĭt nau, mĭn ƀư, tâm mbơh nchră nau đă ma Bộ Chính trị, Ban Bí thư, ăp gưl kan uỷ ăp ntrong kan săk tam tâm nau rđau, đă nau kan bonh đă, nau kan rnoi mpôl, tĭng chroh ndrel n’hao nau tâm mâp đah ƀon lan ndrel Đảng. Tâm năm 2025 Rnâng kan bonh dă Trung ương ndel trong kan bonh đă ăp gưl mra nsôih ƀư lôch nau kan bah Bôk nau nơm kan”./.