Tâm nar mbơh rnoh bonh đă kơl an hăn nti n’gor Dak Lak, ăp rmôt nŭih geh nuih n’hâm lŏng hŏ pă 2,7 rmen gay ma dŏng ân nau bonh đă hăn nti tâm n’gor. Rơh rlau aơ, ăp gưl kan hŏ bonh đă geh bơi tât 14 rmen. Ntơm tơm prăk aơ hŏ kơl an ân âk kon se geh nau rêh jêr jŏt, pă nklâm prăk ân kon se gơih nti; bonh đă kon se ăp gưl, pă nkhôm ân kon nti ndrel nai ntĭm geh nau dơi prêh tâm ăp rơh rlong, nau tâm rlong tâm nkuăl ndrel neh dak.

Wa Phạm Đăng Khoa, Giám đốc N’gâng kan ntĭm nti Dak Lak, Kruanh rmôt mât tơm kơl an kon se, mbơh, nau ân ntoh măt Tơm prăk kơl bonh đă hăn nti bah n’gor Dak Lak đah nau ƀư ngăn mra geh nchŏng kloh nkô̆, nau kan, nau ŭch pă kơl êng, rƀŏng tât kơl an ân săk tam nau kan hun hao ntĭm nti, bonh đă nau ntĭm nti, nti blau tâm n’gor. Rnôk aơ, Rnâng kan kŏ pă 15 nklâm prăk bonh đă ân kon se nti ân 15 kon se geh nau nsôih nti, nti blau bah n’gor Dak Lak./.