Ôi 23/10, ta jrô hop Diên Hồng, Jay Quốc hội hŏ ƀư ntơm pơk rgum rơh hop tâl 6, Quốc hội khóa 15. Lah ta rơh ntơm pơk rơh hop, Kruanh Quốc hội Vương Đình Huệ dăn đă ăp đại biểu Quốc hội gŭ mĭn na nê̆, rblang gĭt, uănh năl dăch ngăn ngăn, ăp tŏng lam lĕ rngôch ăp nău dơi hŏ geh; nchŏng kloh ăp nău nchiăng khan, mpăng đêt; dăn đă, tor luh ăp trong nkra gay geh nău dơi dŭt âk bah năm 2023; mĭn uănh, n’glêh an rnoh tât kan, rnoh âk kan n’hanh ăp nău dơn kan, trong nkra tĭng ƀư trong nchrăp hun hao wăng sa- rêh jêng kon nuĭh, prăk kaih, ngân sách ngih dak năm 2024.

Bah meng nê, Quốc hội mbra mĭn uănh, n’glêh an mpeh nău rgâl du đêt nkô̆ bah Nghị quyết 53 mpeh siƀŭt mbơh gŭ mĭn nău dơi trong nchrăp sŏk mplơ̆ neh, trok tâm, ntop kơl, ntrơn du an ntŭk ƀư tach ndeh păr lam ntŭr neh Long Thành; mĭn uănh lôch jêh geh tĭng ƀư Nghị quyết 43 mpeh trong kơl năm sŏk dŏng prăk kaih ntop kơl an bôk nău kan dâk hao tay wăng sa – rêh jêng kon nuĭh; lôch jêh ôp uănh tay lam trong kan pháp luật tĭng nău đă ta Nghị quyết 101 bah Quốc hội khóa XV.

Ôi 23/10, ta rơh rƀŭn tal 6, Quốc hội gưl 15, Thủ tướng Chính phủ Phạm Minh Chính hŏ mbơh nau tă geh bah nau nchrăp hun hao văng sa, rêh jêng năm 2023, nchrăp nau hun hao văng sa, rêh jêng năm 2024. Tĭng nau mbơh, văng sa rêh jêng lŏ geh nau ndâk, geh dơi nkô̆ nau nchrăp luh; Văng sa Việt Nam lah nau ang bah văng sa lam ntur neh.

Nau kan văng sa lŏ geh ntrŭt dăng, nsôih ntrơn rgâl mrô, ăp nau kan văn hoá, rêh jêng geh kơl an ntuh kơl hun hao, geh nau dơi ngăn. Tâm nau tă geh bah 9 khay, nchrăp năm 2023 nsôih geh đê̆ ngăn 10/15 nkô̆ nau geh dơi ndrel rlet nau nchrăp luh. Ndrel ma nê Thủ tướng hŏ nchŏng luh nau dơi rgum, nkre mbơh 12 nau kan, ntrong kan ngăn bah năm 2024 ndrel tâm rơh tât, tâm nê ƀư rjăp 15 nau kan ngăn mpeh ăp nau kan văng sa, rêh jêng, ntŭk ntu gŭ âm./.