Nhih máy kât nđik, nkret njêng ndơ tuch tăm tăch n’gluh ƀư ta Nkual công nghiệp Tâm Thắng, xã Cư Jút, n’gor Lâm Đồng, ta rnoh neh hvi 22.000 m². Nhih máy geh lĕ rngôch tơm prăk ntuh kơl 150 rmen prăk, rnoh dăng kât nđik 15.000 tấn sầu riêng n’hanh nkret njêng 13.000 tấn chanh rse ăp năm, nta joi nău kan an nklăp 250 nuĭh kan ta ntŭk. Ntơh măt doanh nghiệp, wa Nguyễn Thị Thái Thanh an gĭt, nhih máy mbra mât dŏng tĭng trong rƀŏng âk rnoh khlay. Rlău ma nkret njêng sầu riêng, chanh rse, mbra nkret njêng geh âk ndŏk nja đŏng:

“Mpôl hên ký ton tâm boh đah du băl tâm boh bah Úc, doanh nghiệp way rvăt, ƀư njêng si ônh Biochar bah ntô sầu riêng n’hanh chanh rse. Nău dja mbra kơl mpôl hên nsĭt tay ntô chanh rse n’hanh sầu riêng, bah aơ mbra rdâk njêng rêng wăch tay tâm nău kan tuch tăm uĕh lơn.”

Lah ta rơh lễ sa nkra nhih máy, wa Lê Trọng Yên, Thứ trưởng Bộ Nông nghiệp n’hanh Môi trường, an gĭt, tăch n’gluh ndơ tuch tăm Việt Nam năm rlău aơ tât rnoh 70 rmen USD; êng sầu riêng bơi 4 rmen USD. Tâm 8 khay năm aơ, tăch n’gluh sầu riêng geh 2 rmen USD, hao 26% rđĭl đah ndrel khay dja năm bah năp nơh. Bộ mbra ndrel hăn tay n’gâng kan ta ntŭk rdâk njêng n’gâng kan tuch tăm way blău, ăp tŏng rêng, n’hao rnoh khlay ndơ tuch tăm, tâm nê geh sầu riêng.

Thứ trưởng Bộ Nông nghiệp n’hanh Môi trường dăn đă mpôl doanh nghiệp, ăp tập đoàn n’hanh ƀon lan kan lŏ mir ta Tây Nguyên n’hao dăng rdâk njêng rêng kan tâm nkrêp, rêng rnoh khlay, rƀŏng tât nkret njêng jru; nkre lor nchrăp rƀah gĭt nău ŭch geh ntŭk tăch rgâl gay rdâk njêng săk ntơ lư an ndơ tuch tăm.

“He njêng nkret njêng jru n’hanh tĭng rnoh tât lah ntŭk tăch rgâl moh ndơ ŭch geh ri he rgum tâm ndơ nê, gay rdâk njêng săk ntơ lư tuch tăm Việt Nam lah nsum n’hanh ndơ tăch sầu riêng lah êng. He ân geh nău rgâl gay tâm nđơn ndơ tăm, mô dơn kât nđik sầu riêng ma ân pơk hvi tay bơ, mbrăch, chanh rse… n’hanh ăp ndơ geh ƀư êng ƀa ƀă. Ntơm bah nê, rdâk njêng nâp ăp ndơ tuch tăm tăch n’gluh bah Việt Nam”.

Lôch lễ sa nkra, doanh nghiệp hŏ ký ton tâm boh đah du đêt băl tâm boh rgum rvăt ndơ tuch tăm bah Úc, Trung Quốc n’hanh Pháp, rƀŏng tât rdâk njêng rêng tâm nkrêp kan nsum tuch tăm jĭr êng. Lơn lah, doanh nghiệp hŏ tăch n’gluh kêh sầu riêng kât nđik lor bôk năp tât Trung Quốc, lah 2 container đah lĕ rngôch rnoh jâk 54 tấn.