Ndâk njêng tâm năm 2021 yor ăp nuĭh druh ndăm ngăch prăl, Công ty thương mại Epis, nkuăl M’Đrăk, n’gor Dak Lak, tăch rgâl ăp ntil ndơ mỹ phẩm dơi ƀư bah ăp ndơ geh ơm bah ntŭk. Gĭt tât nău têh dăng bah công nghệ mrô, ăp băl druh ndăm lĕ gĭt tât nuĭh dong tă bah ăp trang mạng xã hội n’hanh dăn ƀư ndơ tâm ăp ndơ tăch rgâl tâm điện tử. Yuh Lê Thị Hồng Thơm, Groi Giám đốc công ty, an gĭt: Aƀaơ ndơ bah doanh nghiệp lĕ geh măt ta lĕ rngôch ăp ntŭk tăch tâm điện tử dơi bên âk nuĭh dŏng git tât n’hanh geh rnoh mâp nuĭh âk kơt: Shoppe, tiki, lazada, tiktokshop... Nău aơ lĕ kơl doanh nghiệp n’hŭch dŭt âk prăk mpla nsơ n’hanh ndơp tăch ndơ.

“Lah du doanh nghiệp ntơm rdâk njêng hôm e âk jêr jŏt đah prăk kaih neh ntu ri nău tăch ndơ ta ăp ntŭk tăch điện tử n’hanh internet lĕ lah nău dăng n’hanh kơl an mpôl hên ntêm nkrem dŭt âk prăk tâm nău manh neh mô lah ăp ntil ma doanh nghiệp mô hŏ geh ơm”.

Săch đŏng nău gĭt tât n’hanh pơk hvi ntŭk tăch bah ăp nău dơh bah tăch rgâl điện tử, công ty tăch rgâl Kim Long, ta nkuăl Krông Buk, n’gor Dak Lak lĕ ngăch geh băl ta âk n’gor tâm lam dak. Wa Đỗ Ngọc Anh, ntoh măt doanh nghiệp an gĭt:

Ndơ bah gâp lah ndơ mhe, yor nê ma gâp lĕ săch ăp trong online lah khlay. Pơng an geh tât rlău 50% doanh nghiệp sŏk geh bah nău kan tăch ndơ pơng tât bah ăp trong tăch rgâl, bah ăp websize tăch ndơ bah nơm. Yor rĭ nău dŏng websize kơt ăp trong online tâm nău tăch ndơ pơng lah du gưl khlay tâm nău ƀư tăch rgâl bah doanh nghiệp nơm”.

Tĭng wa Hoàng Minh Ngọc Hải, Giám đốc Ntŭk boăt nthoi n’hanh rgâl mrô Hiệp hội doanh nghiệp n’gor Dak Lak, rnoh kơp aƀaơ 70% rnoh nuĭh Việt Nam gĭt tât internet n’hanh âk nuĭh lah mom. Rwăt năp ta ăp ntŭk tăch điện tử ntơm jêng bên bah nuĭh dŏng. Doanh nghiệp lĕ rngôch dơi gĭt đah âk nuĭh dơi geh. Hiệp hội lĕ geh bôk nău kan n’hanh trong mkra dơi ƀư, ntop kơl ăp doanh nghiệp Dak Lak boăt nthoi, tăch ndơ, ngăn lah ndơ ta ntŭk ta ntŭk ntô trực tuyến. Wa Hoàng Minh Ngọc Hải an gĭt:

“Mpôl hên lĕ pơk hvi n’hanh tâm rgop rlău 28 nuĭh công nghệ gay jêng du trong tŏng uĕh, tâm rlong gay kơl doanh nghiệp dơi geh ăp trong mkra uĕh ngăn. Ăp trong mkra aơ lĕ dơi an saơ mpeh nău mpôn n’hanh geh săk rnglăy. Rnôk doanh nghiệp dơi hăn ndrel đah ăp ntŭk geh blău ơm, kơt kuăl jă rgâl nău wât tĭng njoăt gâp nsing nơm doanh nghiệp mbra geh âk mpêr n’gar ma tăch rgâl điện tử dôl nsĭt tay n’hanh săk geh âk nău uĕh ta ntŭk ntô mrô”.