Ăp mông ôi, tahen ơm Hán Vinh Hà, tâm thôn Sơ Trà, xã Krông Ana, n’gor Dak Lak lŏ tât tâm ntŭ rong djar păn tăp tă bah ơm. Lôch uănh ăp ntŭk djăr tăp, păng rdeng ur hăn chợ ri mơ hăn tât tâm lŏ chop lŏ. Ƀư ăp nau kan lĕ mơng bah âk năm, kơl păng geh ngih nâp. 5 ha ba dak, 3 ha tơm sa play ndrel ntŭk nkret ndơ tuch tăm ndrel du ntŭk rong kik deh, ăp nau kan aơ leo nsĭt ân tahen ơm âk rmen tâm ăp năm. Wa Hán Vinh Hà, nkoch, gay ma hăn tât nar aơ, wa hŏ rlet âk nau mô dơi yor srê ji ngăn. Nau ma kơl an păng mô nchlơi nau kan nê lah nau ƀư rjăp tâm ăp nau kan ndrel nuih n’hâm nsôih geh nchiăr tâm tahen:

‘Nau ma ân gâp nsôih, mô ŭch geh nau jêr, mô ŭch geh nau ach o, nơm ân nsôih hao. Kơt tĭng nti ntơm bah rnôk hăn tahen nê lah nau rjăp, nau nsôih bah nơm gay ma nơm nkre ƀư, nkre kơl an rnăk vâl, nau rêh jêng”.

            Kŏ lah tahen ơm kơt wa Hán Vinh Hà, âk tahen ơm êng tâm xã Krông Ana kŏ mro tâm nuih n’hâm nâp bah tahen lăp tâm nau rêh. Geh nŭih ndâk ntŭk mât rong, geh ntŭk ndâk ntŭk tăch rgâl. Rnôk nau rêh hŏ đăp mpăn, khân păng lŏ hăn kơl ndrăng tahen ơm ndrel ƀon lan ndrel hao geh.

            Tahen ơm Hoàng văn Cư, tâm ƀon Trấp, rnôk aơ ndâk geh du ntŭk tăch ndoh ndơ kơl an nau kan tuch tăm ndrel rvăt ndơ tuch tăm ƀon lan. Rnôk văng sa geh oi, wa hăn ndrel ma kônh wa ndrel tahen ơm hôm jêr. Ăp năm, 2 ntŭk păng tăch ndơ kơl an âk ngăn ƀon lan rvăt phân trok mbrơi ba kơi, mô geh sŏk prăk rnglay ôh. Wa vay kơl an ăp nŭih geh nau rêh jêr jŏt lơn, khâl, ôp ăp tahen ơm lah ji kuet, ranh ndra. Tahen ơm Lê Đắc Đam, tâm ƀon Trấp, xã Krông Ana nkoch tât nau kan bah wa Hoàng Văn Cư:

            “Tâm ƀon hôm âk ngăn tahen dôl mâp nau jêr, mô geh prăk gay rvăt phân ri geh wa Cư kơl an ân rnoh prăk thuk, mô geh sŏk prăk kon ôh. Tâm ăp nau kan, kơt lah ăp năm lah tahen ơm ƀư nar vay ơm bah rmôt kan, ăp nau kan thể thao lah wa nê kơl an bu da dê”.

            Tĭng wa Hoàng Văn Cư, ăp năm khay hôm gŭ tahen mô êng nsôih nchiăr nti nau gơih pah kan jan sa ma hôm nkah ăp tahen rêh ân geh nau kan ân ƀon lan, n’ăp ma rnôk tâm lơh tâm su hŏ jăng ngai:

            ‘Rnôk lăp tâm ntŭk tahen kăl e, ri hên geh nchiăr nti mpeh nau kan, nau rêh jêng ndrel nuih n’hâm kơl an. Tâm lơh kăl e mô lah tâm nau đăp mpăn rnôk aơ kơt nê đŏng, tahen gay rêh leo trong ân kon sau kơt tĭng râng rmôt tahen ơm ri ân tâm bonh oh nô mât ueh n’hâm soan, gơih rƀŭn rgum ndrel tâm rgop kơl an ƀon lan”.           

            Rmôt tahen ơm xã Krông Ana rnôk aơ geh bơi tât 1000 nŭih. Ntơm năm 2025, rmôt kan mô hôm nŭih tâm rnăk ach o, bơi tât 1/3 rnoh nŭih geh nau rêh mbơm oi. Wa Đỗ Xuân Đản, Kruanh Rmôt tahen ơm xã Krông Ana ân lah, geh dơi nau nê tă bah nau kan leo nkô̆ nau ntĭm nti ndrel ƀư tĭng nau Wa lăp tâm ăp nau kan ngăn kơt lah tâm kơl hun hao văng sa, n’huch ach o, ndâk njêng ƀon lan mhe ndrel mât chăm ân nŭih tâm rmôt. Ăp nau kan mô knŭng rgop nau rêng nuih n’hâm nau rđau đă 05 bah Bộ Chính trị ma hôm ntoh nau dơi, nau kan bah tahen ơm tâm rnôk đăp mpăn, rêng rup gui ueh mpeh “Tahen Wa Hồ” rgop nau rgâl nau geh jêng bah ƀon lan:            ‘Ăp cán bộ, tahen bah rmôt tahen ơm xã Krông Ana hŏ nsôih rklaih nau jêr gay hao rklaih nau rêh, rnôk lôch hăn tahen kŏ mât ndrel ƀư ueh lơn tay nau vay ơm tahen Wa Hồ, lah nau kan ntoh lư tâm ăp nau kan ndâk njêng ƀon lan mhe kơt lah pă neh, nkra trong, bonh đă kơl an ƀon lan, kơl an nŭih mâp nau jêr, nsôih ntrŭt dăng nau kan tâm nkuăl gay hao jêng”.

            Nau tâm lơh hŏ hăn ngai, ăp ntŭk lŏ têh ndrel ntŭk mât rong têh nar aơ hŏ rgâl đah ăp ntŭk tâm lơh ơm kăl e. Ntŭk ƀư nau kan bah tahen ơm kăl e hŏ rgâl êng ngăn, yơn đah nau nsôih rlet nau jêr, nuih n’hâm nau kan prêh ndrel nau tâm nkoch kơl hôm ơm tâm nê. Nê kŏ lah nau kan bah tahen ơm tâm xã Krông Ana lŏ ntĭm nti ndrel ƀư tĭng nau Wa đah ăp nau kan ueh lăng, dơh dăch tâm ăp nar./.