Kêng măng ntri (18/9), ta Đà Nẵng, Bộ Thông tin n’hanh Truyền thông ƀư họp báo mbơh mpeh Tâm nchră Bộ trưởng Thông tin ASEAN. Tĭng nê, ntơm bah nar 20 tât 23/9/2023, ta nkual ƀon têh Đà Nẵng ƀư tâm nchră Bộ trưởng Thông tin ASEAN tâl 16 (way kuăl lah 16th AMRI), Tâm nchră Bộ trưởng Thông tin ASEAN+3 tâl 7 (way kuăl lah 7th AMRI+3) n’hanh ăp Tâm nchră kruanh gưl têh geh tât.

Nklăp 60 nhà báo tâm dak râng họp báo. Ƀư tơm rơh họp báo, wa Nguyễn Thanh Lâm, Thứ trưởng Bộ Thông tin n’hanh Truyền thông an gĭt, nkô̆ rloh rlău bah ăp Tâm nchră lah “Nkoch gĭt nău lư: Ntơm bah nău lư tât nuĭh gĭt blău yor du ASEAN nsrôih ndôr êng n’hanh bên di”. Aơ lah nkô̆ dơi Việt Nam sơch rloh rlău tâm lam nkô̆ nchrăp lor dăn đă bah ăp rơh tâm nchră n’hanh nău kan bah meng rơh rgum nchră tâm rnôk dja. Nkô̆ nkoch kloh nău khlay kan, nău hăn ƀư bah trong kan nkoch trêng tâm rơh mhe, ndơ̆ nău lư jêng suan ntrôl hun hao, mô dơn mbơh gĭt nău lư ma hôm ntrŭt ntrôl ndơ̆ rgâl nău lư jêng nău gĭt blău, rdâk njêng du ASEAN nsrôih êng, rdâk tay suan dăng nơm ơm geh aƀaơ, nău dơi ât rdâng n’hanh bên di gay năl gĭt nău khlay kan, ntŭk gŭ kan bah ASEAN mô dơn rƀŏng tâm mpôl nơm ma hôm nchrăp rdâng lơh đah ăp nău tât rgoh n’gơ bah năp nô nău lam ntŭr neh aƀaơ./.