Ôi 25/3, ta Jay Quốc hội ntơm pơk Tâm nchră đại biểu Quốc hội way rnâng kan tâl 7 gay tâm nchră mpeh ăp trong nchrăp luật hao rblang dăn Quốc hội ta Rơh hop tâl 9. Tâm nchră ƀư tâm rnôk lam trong kan chính trị dôl dŭt ndăn ngăch an ƀư ăp nău dơn kan dăp rgum tay nuĭh kan. Mpeh trong kan dja, Kruanh Quốc hội Trần Thanh Mẫn an gĭt, rơh bôk năp, ăp n’gâng kan, nhih pah kan hŏ dăp rgum glêh tam nuĭh kan, rơh 2 ƀư rgâl nkra Hiến pháp, nkra du đêt luật n’hanh dăp rgum 50% ăp nhih pah kan bah n’gor.

Rơh hop tâl 9 nchrăp hop tâm bơi 2 khay, tâm rnôk dja mbra sŏk nău rgop ƀon lan mpeh rgâl nkra Hiến pháp. Êng, ntơm bah kêng dŭt khay 4 tât khay 5, Ủy ban thường vụ Quốc hội mbra rgum hop âk tơ̆ gay dăp rgum nhih pah kan gưl xã. Ăp trong nchrăp luật tâm nchră ta rnôk Tâm nchră rơh dja rgâl âk trong kan êng êng, tâm nê geh ăp luật dŭt khlay, ring tam tât nău kan ƀư njêng tăch rgâl n’hanh mpôl doanh nghiệp.