Ôi 24/10, ta Hà Nội, ƀư Tâm nchră khoa học dak bah dih đah nkô̆ “Ntrơn du dak bah dih n’hanh lăp rgum nău rêh – lăp rgum n’hanh hun hao nkrum lam”. Nar ƀư tă bah Học viện bu ur Việt Nam n’hanh Nhih nti đại học Chonnam Hàn Quốc kan nsum ƀư, đah nău tât râng bah ăp nuĭh khoa học bah Việt Nam, Thái Lan n’hanh Trung Quốc.

Tĭng nău mbơh bah Nhih pah kan ntrơn du dak bah dih năm 2022, nchroh lam ntŭr neh geh 281 rkeh nuĭh ntrơn du năm 2020, tâm ban đah 3,6% rnoh nuĭh lam ntŭr neh. Rnoh âk nuĭh ntrơn du dak bah dih hŏ hao âk mbro tâm 5 rach năm aơ. Yơn lah, bah meng nê hôm geh dŭt âk nkô̆ nău geh tât ntrơn du kơt: Đăp mpăn rêh jêng kon nuĭh, đăp mpăn tâm trong hăn ntrơn du n’hanh đăp mpăn geh nău kan an nuĭh ntrơn du. Aơ lah ăp nkô̆ nău ân dơi uănh khlay gŭ mĭn âk lơn. Yor kơt nê̆, ta tâm nchră, ăp học giả, ăp đại biểu bah Việt Nam, Hàn Quốc, Thái Lan n’hanh Trung Quốc rgum tâm nchră tâm 4 nkô̆ tơm lah: Ntrơn du n’hanh ăp nkô̆ nău mpeh bu ur; ntrơn du n’hanh mât chăm n’hâm suan; ntrơn du n’hanh ntop kơl nău rêh; nkô̆ nău êng ƀa ƀă geh tât ntrơn du đŏng./.