Ôi 5/3, ta nkual ƀon têh Buôn Ma Thuột, ƀư tâm nchră khoa học lơh dơi Tây Nguyên 1975 n’hanh n’gul rach năm rdâk njêng, hun hao n’gor Dak Lak. Nar ƀư lah ngoăy tâm ăp nău kan rƀŏng tât nkah ndray 50 năm rklaih luh Tây Nguyên, miền Nam, dơn ngoăy neh dak, tă bah Bộ Quốc phòng kan nsum đah Tỉnh uỷ Dak Lak ƀư. Ta tâm nchră, ăp kruanh mât bôk tahen, nuĭh khoa học n’hanh tahen ơm rblang luh nkô̆ ƀư jêng geh nău dơi dja, lah rjăp nău rđău đă kloh rsang di bah Bộ Chính trị n’hanh nău blău miăt lơh, njêng ndrât ndal, wăch rgum phŭng rlăng gay tahen he kâp lơh ta ăp ntŭk gŭ nde khlay kơt Đức Lập n’hanh Buôn Ma Thuột, Pleiku n’hanh Kon Tum.

Nău dơi dja hŏ njêng jâng nsan an trong hăn lơh rklaih luh lĕ rngôch miền Nam n’hanh dơn ngoăy neh dak. Râng n’hanh rđău đă ta rnôk tâm nchră, Thượng tướng Lê Huy Vịnh, Thứ trưởng Bộ Quốc phòng an gĭt, Ban tổ chức hŏ dơn geh bơi 90 nău mbơh nsŏng kơl đah âk mpưm nkô̆, săk tam, geh âk mpeh njônh uănh mhe mpeh lơh dơi Tây Nguyên. Tâm nchră lah rnôk khay gay Đảng bộ, N’gâng kan n’hanh ƀon lan n’gor Dak Lak nkoch mbơh tât ăp đại biểu, tahen- ƀon lan lam dak ăp nău dơi hŏ geh tâm n’gul rach năm rdâk njêng n’hanh hun hao.