Ta nkual ƀon têh Gia Nghĩa, Bộ Công thương kan nsum đah UBND n’gor Dak Nông ƀư tâm nchră ntrŭt nsôr công nghiệp miền Trung- Tây Nguyên tâl XIII. Tĭng nău mbơh, năm 2022 n’hanh 9 khay năm 2023, lĕ rngôch prăk dŏng ntrŭt nsôr công nghiệp hŏ dơi tĭng ƀư bah 15 n’gor miền Trung- Tây Nguyên lah 115 rmen prăk.

Tâm nê, tơm prăk dŏng kan an ntrŭt nsôr công nghiệp gưl neh dak tâm pă an ăp n’gor lah rlău 56 rmen prăk, hôm ƀa ƀă lah prăk n’gor nơm.  Tĭng uănh năl bah Cục công thương n’gor, Bộ Công thương, nău kan ntrŭt nsôr công nghiệp bah 15 n’gor Miền Trung- Tây Nguyên dơi an ƀư  âk ntil, mât dŏng uĕh nău dơi tâm rlong n’gor. Gay ƀư lôch jêh trong nchrăp ntrŭt nsôr công nghiệp bah tĭng n’gor n’hanh nkual tâm ăp khay kêng dŭt năm 2023, ăp n’gor ân rgum tâm du đêt nău kan rgum tơm kơt: tĭng groi nđôi, ntrŭt ntrôl tĭng ƀư ăp đề án ntrŭt nsôr công nghiệp tĭng di rnoh ngăch; n’hao dăng ntĭm nti, ôp uănh, groi nđôi n’hanh năn ngăch tâm rnôk an ƀư ăp đề án.