Rnoh năch pâl nđaih tât ta n’gor Đăk Lăk ta rơh rlu Tết Nguyên đán Ất Tỵ năm aơ hao 1,3 tơ̆ đah khay aơ năm e, nsĭt tay nău geh klâp ma 60% rmen prăk. Lam n’gor lĕ geh vơt 180 rbăn năch pâl nđaih, hao 24% đah khay aơ năm e, tâm nĕ 98% lah năch tâm ntŭk. Ăp ntuk pâl nđaih văn hóa, lịch sử geh âk năch tât pâl rlưn. Kơt ta Bảo tàng Đăk Lăk, lĕ geh vơt 280 mpôl đah rbăn năch. Ăp ntuk pâl rlưn sinh thái, văn hóa, pâl nđaih geh dak me, dak bât, leng dak le geh âk năch tât, uănh nău ueh nău nđik, ăp nău pâl rlưn văn hóa, geh git đah ăp nău pah kan pâl nđaih dăng klach phit nuih, vah duk, hao leng. Mât đăp mpăn ueh lăng an năch, ăp ntŭk tăch rgâl pâl nđaih lĕ nchrăp ueh mpeh ndeh klư, mpôl kơl kan, vơt kơl ăp nuĭh pă dăp nuih kan kâp chăm lĕ măng nar tâm ăp nar ta năp, tâm n’hanh lôch tết Nguyên đán. Ƀư tĭng ăp nău way mpeh nău ntrŭnh mbơh dăn, lir rnoh khlăy n’hanh rnoh khlăy ăp ntil ndơ, tăch di đah rnoh ntrŭnh, mât đăp mpăn kloh ueh ntuk ntô.

Kêng măng 2/2, UBND n’gor Lâm Đồng mbơh, rơh Tết Nguyên đan Ất Tỵ aơ, rnoh năch tât Lâm Đồng uănh pâl, rlu rlău hao bơi 36% nkôp đah rơh aơ năm e. Lam n’gor wơt nklăp 380 rbăn năch uănhg nsong, rlu rlău, hao bơi 36%; năch rlu rlău geh 270 rbăn nuĭh, hao bơi 70% nkôp đah năm e. Rnoh năch rgum âk bah nar 2 tât 4 Tết. Dôl uănh ngăn, tâm rnôk năch tât Lâm Đồng hao nkôp đah rơh aơ yơn năch tât nkual ƀon têh Đà Lạt hŭch. Nkual ƀon têh knŭng wơt rlău 100 rbăn năch pâl nđaih, hŭch rlău 33 rbăn năch nkôp rơh Tết Nguyên đán năm e. Tâm rơh Tết Nguyên đán năm 2025, rmôt kan dơi kan n’gor Lâm Đồng mkra rmal rlău 1.000 nuĭh tih đăp mpăn ntung trong.