Nkah ndray 95 năm Nar njêng Đảng Cộng sản Việt Nam (03/02/1930 - 03/02/2025), ta nkual têl ơm yău gưl neh dak mha êng Tân Trào, nkuâl Sơn Dương, n’gor Tuyên Quang, Trung ương Đoàn thanh niên Cộng sản Hồ Chí Minh kan nsum đah UBND n’gor Tuyên Quang ƀư rgŏ jă nar Tết tăm si “Mbro mbrăng nkah gĭt Wa Hồ” Năm mhe Ất Tỵ n’hanh rgŏ jă tâm rlong mbah rhơn Đại hội Đảng ăp gưl hăn tât Đại hội đại biểu lam dak tâl 14 bah Đảng.

Rgŏ jă rơh tâm rlong tâm lam Mpôl njêng geh nău dơi mbah rhơn Đại hội Đảng ăp gưl n’hanh Đại hội Đảng lam dak tâl 14, Bí thư bôk năp Trung ương Đoàn Bùi Quang Huy lah rjăp: ăp gưl Đoàn n’hanh nsum mpôl đoàn viên, druh ndăm nsrôih tĭng ƀư geh nău dơi ăp nkô̆ tâm rlong lah: Nkoch trêng mpeh nău way ơm lịch sử chrat ang bah Đảng Cộng sản Việt Nam; lah rjăp nău khlay, nău nsing nơm, han săk, bôk rngok gĭt blău, nău dơi rđău đă, nău dơi mât bôk kan n’hanh suan rlăch ndăng bah Đảng tâm du njăr trong cách mạng 95 năm aơ, rgop n’hao neh dak nâp jâng chuat lăp tâm rơh mhe, rơh lhung jong săk bah rnoi nuĭh; ntik n’hao nuih n’hâm dâk chŏl lor, râng kơl êng bah druh ndăm tâm trong kan, gâl kan druh ndăm ngăn ngăn n’hanh nsĭt geh nău dơi; an ƀư ăp nău kan, gâl kan druh ndăm, leo ƀư rơh tâm rlong, ntơm pah ƀư, sa nkra ăp ntŭk ƀư, gâl kan n’hanh leo ƀư Nar druh ndăm ndrel dâk kan mbah rhơn Đại hội Đảng ăp gưl, hăn tât Đại hội 14 bah Đảng; Rdâk njêng Đoàn nâp dăng, lah rmôt nchrăp lor nsing nơm ngăn bah Đảng; Râng rdâk njêng n’hanh mât njrăng Đảng; nsrôih rgop tâm siƀŭt nchrăp lor dăn đă Đại hội 14 bah Đảng. Bí thư bôk năp Trung ương Đoàn Bùi Quang Huy lah kloh:

Ban Bí thư kuăl jă đoàn viên druh ndăm rchong lam dak ma lĕ nuih n’hâm tâm rŏng kloh rsang bah he ân ntơm ma ăp nău  kan bol jê̆ yơn ngăn ngăn, geh uĕh an nsum mpôl gay rgop njêng nuih n’hâm tâm rlong khuh n’gôr tâm ăp gưl n’gâng kan đoàn. Tâm khuh n’gôr bah rơh rgŏ jă tâm rlong lam mpôl gay mbah rhơn nău dơi Đại hội Đảng bộ ăp gưl, ta me neh “Thủ đô dâk lơh”, he ndrel tĭng ƀư du nău kan dŭt geh nkô̆ khlay nê lah rơh rgŏ jă Tết tăm si mbro mbrăng nkah gĭt Wa Hồ. Nău kan dja hŏ way jêng ăp năm, mpơl nuih n’hâm dâk chŏl lor, nău dơn kan bah druh ndăm Việt Nam, bah mpôl kan Đoàn TNCS Hồ Chí Minh tâm trong leo mât ntŭk gŭ rêh, rgâl duh nđik trôk nar.

Lah ta rơh lễ, wa Đỗ Văn Chiến, Kruanh Ủy ban Trung ương Mặt trận tổ quốc Việt Nam rnê âk Trung ương Đoàn hŏ lor nchrăp n’hanh năn ngăch ƀư rơh rgŏ jă tâm rlong rƀŏng tât Đại hội Đảng ăp gưl n’hanh Đại hội Đảng lam dak tâl 14. Gay rơh tâm rlong geh nău dơi ngăn ngăn, ring lam dăng nuih n’hâm dâk leo lor, nău nđơr bah druh ndăm, wa Đỗ Văn Chiến dăn đă:

Trung ương Đoàn ân uănh khlay ntrôl dăng pah kan nkoch trêng, n’hao nău gĭt êng, nău dơn kan tâm ăp gưl Đoàn, đoàn viên, mhâm ƀư an rơh tâm rlong jêng rơh sinh hoạt chính trị jru hvi tâm lam Đoàn, geh dơi nău tât râng nsrôih uĕh bah âk mpưm đoàn viên, druh ndăm rchong lam dak n’hanh njêng dơi nău ring tam tâm lam rêh jêng uĕh; Nê mbra lah ăp ntung njŏ, gung trong, thư viện, jrô nti, mô lah ngoăy tâm ăp đề tài gŭ mĭn khoa học, ăp trong nchrăp ntơm njêng nău kan blău ƀư mhe, trong leo ƀư jêng têh dăng mhe, nsĭt luh ntil tă bah druh ndăm ƀư tơm.

Lah rjăp nău tăm si mô dơn lah nău kan ngăn ngăn gay rgâl uĕh neh ntu ntŭk gŭ rêh, ma hôm rgop tâm nău ŭch tât hun hao nâp dăng bah neh dak n’hanh ƀư jêng ngăn ngăn nău ton bah Chính phủ Việt Nam ta ăp rơh rgum nchră dak bah dih, tâm nê geh rnoh tât bah hôm n’gluh n’huk djơh tâm năm 2050, wa Đỗ Văn Chiến dăn đă lĕ rngôch ăp gưl n’gâng kan Đoàn, đoàn viên druh ndăm lam dak ân ntik n’hao nuih n’hâm dâk chŏl lor, blău ƀư mhe n’hanh nău dơn kan bah he gay ƀư jêng ngăn ngăn ăp nkô̆ tâm rlong hŏ rgŏ jă.

Ta rơh lễ, ăp đại biểu hŏ khâl, pă nklâm ndơ me Việt Nam dăng janh; kơl  an  40 nklâm ndơ an rnăk dơi kơl; 30 nklâm học bổng an kon se nti geh nău rêh jêr jŏt nsan hao tâm kơt nti; 10 nklâm ndơ an bu ranh ƀon, kruanh ƀon ta nkuâl Sơn Dương, n’gor Tuyên Quang đah lĕ rngôch rnoh khlay 100 rkeh prăk.

Tâm trôm bôk nău kan, Trung ương Đoàn TNCS Hồ Chí Minh an ƀư ndơ kan druh ndăm mbah rhơn Đại hội Đảng tâl 14 lah: 15 jay an druh ndăm geh tât khuch phŭt sial lơh, 02 mblâm jay rhơn răm, jâng gung pâl thể thao nsum mpôl, jay Khăn quàng đỏ, Mir tơm druh ndăm, trong hăn tâm thôn ƀon, ntŭk pâl rlưn an kon se jê̆, Jay 26/3, 36 trong mpoh ang ma pil măt nar, 20ha bri tơm druh ndăm, ntop kơl 13 rmen prăk bah tơm prăk manh tơm Prăk nkrem gưl neh dak mpeh nău ƀư n’hong dak bât Trung ương Đoàn. Lĕ rngôch rnoh khlay ndơ an ƀư rlău 21 rmen prăk.

Lôch rơh rgŏ jă, ăp kruanh rđău kan Đảng, Ngih dak ndrel ăp đại biểu, đoàn viên druh ndăm n’hanh ƀon  lan ta ntŭk ndrel râng tăm tơm si ta Nkual nkah gĭt ăp bŭnh ranh Cách mạng ơm leo lor bôk năp, Nkual têl ơm yău  mha êng Tân Trào, nkuâl Sơn Dương, n’gor Tuyên Quang.