Ôi 5/3, ta nhih pah kan Chính phủ, Thủ tướng Phạm Minh Chính hŏ ƀư tơm rơh hop Chính phủ tât leh khay 2 năm 2025. Tĭng nău mbơh bah Bộ Tài chính, nô nău wăng sa- rêh jêng kon nuĭh 2 khay geh âk nău dơi uĕh, geh rlău khay bah năp nơh n’hanh ndrel năm bah năp nơh; nuĭh ƀon lan, doanh nghiệp, nuĭh ntuh kơl tâm n’hanh bah dih dak, ăp trong tĭng prăk kaih, dăp rgum nsing nơm dak bah dih... n’hao âk nău nsing nơm tâm nău mpŏng hun hao bah jâng wăng sa. Nsĭt geh tơm prăk ngân sách ngih dak geh 25,4% trong nchrăp sŏk dŏng, hao 25,7% rđĭl đah ndrel khay dja. Nsĭt geh n’gluh n’glăp 2 khay hao 12% rđĭl đah ndrel khay dja.

Ta rơh hop, ăp nuĭh kan Chính phủ hŏ an nău rgop uănh năl mpeh  nô nău wăng sa- rêh jêng kon nuĭh khay 2 n’hanh 2 khay; ăp bôk nău kan rnoh tât gưl neh dak; nô nău n’gluh tơm prăk ntuh kơl. Thủ tướng đă ăp đại biểu dăn đă ăp rgum tơm rđău đă, nchŏng đă, ƀĭt juet tâm let năp tay gay năm 2025 ân hun hao dŭt đêt 8%, rgop khlay tĭng ƀư geh nău dơi trong nchrăp hun hao wăng sa- rêh jêng kon nuĭh 5 năm 2021-2025, njêng suan ntrôl, nuih n’hâm nsan mhe gay neh dak nâp jâng chuat lăp tâm rơh hun hao mhe, rơh hun hao lhung jong săk, rdâk njêng neh dak geh ndrŏng, srăch uĕh, têh dăng, ƀon lan hơm răm, rhơn nđơr.