Lơ 24/3, ta Hà Nội, Thủ tướng Phạm Minh Chính ƀư tơm Rƀŭn nchră “Đăp mpăn rnă njrăng rhŏ an hun hao wăng sa-rêh jêng nkual Tây Bắc n’hanh kiău ma”. Ntoh ngơi n’glôn jêh Rƀŭn nchră, Thủ tướng Chính phủ Phạm Minh Chính mĭn lah: Tây Bắc n’hanh kiău ma lah ntŭk geh trong kan khlay mpeh chính trị, wăng sa-rêh jêng, mât njrăng bri dak, rnă njrăng, rĭ “mpông lăp bôk năp” mpeh Bắc bah neh dak n’hanh tĭng đah nău kan ndâk njêng, mât njrăng ƀư tơm neh ntu bah Neh dak.

Thủ tướng Chính phủ lah rjăp, ăp ban, n’gâng kan, nău kan, ƀon lan rgum mbơh ƀư tĭng geh săk rnglăy nău kơl rnoi nuĭh, ntil chroh; ƀư tĭng ăp bôk nău kan hun hao wăng sa, văn hóa, rêh jêng, njêng nău kan, ntrôl uĕh mĭn êng, ƀư êng, hao êng bah ƀon lan tâm hun hao wăng sa rêh jêng n’hanh mât ndrăy, ƀư uĕh tay ăp nău khlay bah văn hóa, chroh rƀŭn way ơm, rgop n’hao nău rêh drăp ndơ, nuih n’hâm bah ƀon lan ăp rnoi nuĭh ta ntŭk. Thủ tướng Chính phủ đă ăp n’gâng kan, nău kan, ƀon lan rgum ƀư tĭng tâm 5 rmôt nău kan khlay, na nao, tâm nĕ tâm rgop rjăp đah hun hao wăng sa-rêh jêng đah đăp mpăn mât njrăng bri dak, rnă njrăng ta nkual Tây Bắc n’hanh kiău ma.