Kêng măng 3/2, Thủ tướng Chính phủ Phạm Minh Chính ƀư  tơm rơh hop Rnâng kan Chính phủ đah ăp n’gâng kan uănh năl nô nău Tết n’hanh an ƀư nău dơn kan rgum tơm bah kơi Tết. Mbah rhơn ƀon lan nkre wơt Tết Ất Tỵ 2025 rhơn mƀak, tâm rŏng, đăp mpăn, “Trôm răm, bah lơ uĕh nse”, ăp rnăk geh Tết, lam dak geh Tết, Thủ tướng Chính phủ uănh năl, nău ƀư nchrăp, wơt Tết đăp mpăn răm mƀak, uĕh reh, mpêt nkrem, tâm rŏng, ƀon lan đăp mpăn, rĭng grep, ăp rnăk geh Tết, tât ăp rnoh ndơ̆ luh tĭng nău rđău đă bah Ban Bí thư n’hanh Chính phủ, Thủ tướng Chính phủ; njêng nuih  n’hâm khuh n’gôr, rhơn nđơr, nsan dăng, nuih n’hâm nđơr bah lam rnoi nuĭh lăp tâm năm 2025.

Thủ tướng Chính phủ an gĭt, bơi tât Đảng bộ Chính phủ mbra ƀư tâm nchră lor bôk năp; đă ăp n’gâng kan, ăp n’gor tĭng ƀư jăp 13 rmôt nău kan tơm n’hanh 67 nău kan na nê̆ an ăp n’gâng kan, ăp nhih pah kan, ăp n’gor rgum an ƀư lôch bah kơi Tết dĭl; ntrŭt ntrôl ntuh kơl, lơn  lah ăp trong nchrăp kan, ntŭk ƀư khlay gưl neh dak, ăp bôk nău kan gưl neh dak; ƀư lĕ n’hâm suan, geh nău tam pah kan dăp rgum, glêh tam nuĭh kan; uănh khlay tĭng ƀư ăp trong mât bah tât rmanh kan; tĭng ƀư jăp trong kơl ăp tŏng nău rêh, ntrŭt ntrôl dăng ăp nău kan ƀư njêng tăch rgâl, nta joi nău kan, joi trong rêh an nuĭh ƀon lan, nsrôih tât geh hun hao năm 2025 ntơm bah 8% let lơ...