Nar 20/9 tĭng mông New York, ta Nhih pah kan Liên hợp quốc, Thủ tướng Chính phủ Phạm Minh Chính hŏ mâp Kruanh Đại hội đồng Liên hợp quốc khóa 78 Dennis Francis. Ta rơh mâp, Thủ tướng Phạm Minh Chính lah rjăp Việt Nam ŭanh khlay n’hanh n’grŏ tĭng nău khlay kan rgum tơm bah Liên hợp quốc tâm rêng kan mât ŭanh lam ntŭr neh, gay rdâng lơh đah ăp ntul rlong nsum dŭt têh aƀaơ n’hanh Việt Nam ton nsrôih rgop tâm nău an ƀư lor nău kan têh khlay bah Đại hội đồng Khoá 78.

Kruanh Đại hội đồng Liên hợp quốc Dennis Francis rnê âk tâm boh Liên hợp quốc-Việt Nam. Wa Dennis Francis an lah Việt Nam geh âk  nău dơi mpeh ndơ̆ nuĭh ƀon lan klaih rlău ach o n’hanh hun hao neh, mbra tâm pă đah lam ntŭr neh, ndrel ntrŭt ntrôl tĭng ƀư ăp rnoh tât hun hao jŏ jong, rdâng lơh đah rgâl trôk nar, rnă ntêm ndơ sa. Kruanh Đại hội đồng tâm ban ŭch mbra tâm boh ndrel Việt Nam gay ntrŭt ntrôl tĭng Hiến chương Liên hợp quốc, luật pháp lam ntŭr neh n’hanh tĭng trong kan âk ding.

Tâm rnôk dja đŏng, Thủ tướng Chính phủ Phạm Minh Chính hŏ mâp Thủ tướng Thái Lan. Bar ding tâm ban ŭch ndrel an ƀư ăp nău kan rgum tơm tâm boh gay ntrŭt ntrôl tâm boh têh jong Việt Nam-Thái Lan lăp tâng jru tay, geh nău tam, ngăn ngăn.