Di rnôk râng rƀŭn gưl prêh ASEAN-DCC ta nkuăl ƀon têh Riadh, Ả-Rập, Xê-út, Thủ tướng Chính phủ Phạm Minh Chính hŏ mâp rđau kan du đê̆ dak ASEAN. Ta rnôk tâm mâp ma Thủ tướng Campuchia, bar ding tâm ban nau mra ntrŭnh ƀư ân săk tam ăp nau nchrăp hŏ tă ký ton bah bar dak, ntrŭt dăng nau tâm boh, tâm nthoi nau kan văng sa, rgop nau kơl an nsum tâm nau ndâk njêng nau kan văng sa êng, ƀư tơm geh nsum đah lam ntur neh jru, ngăn ndrel săk tam. Tâm rnôk tâm mâp ma Tổng thống Philipines, bar rđau kan lah rjăp nau ŭch n’hao nau kan tâm boh đah Việt Nam ndrel Philipines gay năn rdâng bah năp nau tât khuch bah nau kan lam ntur neh ndrel nkuăl tâm rơh rlau aơ.

Tâm rnôk tâm mâp ma Thủ tướng Singapore Lý Hiển Long, bar rđau kan ndrel lah rjăp n’hao nau tâm mâp gay ma kơp ndrel tâm nchră nau rƀŏng doh rklaih nau jêr, nau kol ndrel pơk trong nơih ân nau tâm boh ăp nau kan. Bar Thủ tướng hŏ tâm nchră mpeh nau rƀŏng tât n’hao nau tâm boh bar dak gao Nau tâm boh kan nsum ăp ntil tâm rnôk tâm di. Bar rđau kan hŏ tâm nchră mpeh ăp nau kơl an, nau tơm tâm nau kan hun hao tâm boh văng sa Việt Nam-Singapore./.