Ta nhih pah kan Liên hợp quốc, Thủ tướng Chính phủ Phạm Minh Chính hŏ mâp Tổng Thư ký Liên hợp quốc Antonio Guterres. Tâm mông nar dêh bên, Thủ tướng Chính phủ Phạm Minh Chính rnê âk nău khlay kan n’hanh nău rgop bah Tổng Thư ký n’hanh Liên hợp quốc an đăp mpăn, rnă njrăng lam ntŭr neh, nkra ăp ntŭk duh jêr, nkre lah rjăp Việt Nam ŭch tĭng n’hanh mbra rgop tâm ăp nău nsrôih nê. Thủ tướng Chính phủ ŭch tĭng ăp trong an ƀư lor aƀaơ bah Tổng Thư ký, tâm nê geh rêng nchrăp an Tâm nchră gưl têh let năp nchrăp ƀư năm 2024. Thủ tướng an gĭt Việt Nam dôl nsrôih kan nsum đah ăp mpôl kan tâm rêng kan Liên hợp quốc an ƀư âk nău kan tâm boh, lơn lah đăp mpăn rnă njrăng lam ntŭr neh, râng mpôl tahen mât đăp mpăn Liên hợp quốc ta âk ntŭk duh hô, ndơ̆ rgâl gay tĭng ƀư ăp rnoh tât hun hao jŏ jong, ndơ̆ rgâl ŭnh nar geh nău tâm ban, tĭng ƀư geh nău tâm ban nău rêh, mô an geh du hê ntlơi êng bah kơi. Nkhêp geh rnôk dja, Thủ tướng Chính phủ Phạm Minh Chính jă Tổng Thư ký António Guterres khâl tay Việt Nam.

Kŏ ta New York, Thủ tướng Chính phủ Phạm Minh Chính hŏ vơt Nŭih kan ntoh măt bah Tổng thống Hoa Kỳ mpeh nau rgâl mhe trôk nar John Kerry nchră tât nau ntrŭt dăng ngăch nau ƀư nau nchrăp kan khlay bah rơh khâl ngăn lah tâm nau kan rdâng đah trôk nar lơh. Ndrel nar 21/9 tĭng mông dak nê, Thủ tướng Phạm Minh Chính hŏ tâm nchră nau kan geh nkô̆ “Ntrŭt dăng nau hun hao nâp nâl tâm nau kan văng sa lam ntur neh geh âk nau rgâl” đah ăp giáo sư, nŭih ƀư nau kan văng sa, nŭih kan mĭn njêng bôk năp tă bah ăp ngih săm ƀŭt Đại học Harvard, Colombia, Yale. Aơ lah ăp ntŭk kan ntĭm nti ndrel mĭn njêng nau kan geh nau tă bah ơm, kơl an ndrel ntoh lư tâm lĕ ma Hoa Kỳ ndrel lam ntur neh. Ntoh nau mbơh leo, Thủ tướng Phạm Minh Chính lah rjăp nau kan bah Việt Nam uănh khlay nau n’hao tâm nchră, mbơh nau kan mpeh ăp nau kan văng sa, hun hao ăp ntŭk ƀư nau kan bôk năp bah lam ntur neh./.