Ôi 25/9 mông ta ntŭk, Tổng thống Cộng hòa Liên bang Brazil Luiz Inacio Lula da Silva ƀư tơm rơh wơt ngăn Thủ tướng Chính phủ Phạm Minh Chính, lôch rnôk wơt ngăn, Thủ tướng Chính phủ Phạm Minh Chính hŏ tâm nchră đah Tổng thống Brazil. Ta rơh rgum nchră, Tổng thống Brazil nsing nơm hăn khâl mbra rgop n’hao tâm boh way ơm tâm rnglăp n’hanh tâm boh uĕh lăng đah bar dak hao prêh mhe tâm let năp tay, rgop uĕh an đăp mpăn, hun hao ta bar nkual n’hanh lam ntŭr neh.

Bar ding di nuih n’hâm saơ tâm boh đah bar dak hun hao uĕh tay n’hanh lơn ma geh nău tam, ngăn ngăn, lơn lah mpeh chính trị, tâm boh dak bah dih, wăng sa tăch rgâl, njrăng n’gang neh dak rnă njrăng, tuch tăm, khoa học công nghệ, văn hóa, ntĭm nti. Bar ding tâm ban ŭch n’hao dăng tay ăp trong hăn khâl, tâm mâp gưl têh n’hanh ăp gưl ta ăp trong kan Đảng, Ngih dak, Chính phủ, Quốc hội; kan nsum ƀư jăp ăp nău kan nkah ndray 35 năm njêng tâm boh tâm năm 2024.