Ôi lơ 6/3, jêh rnôk vơt ƀư ueh lăng tâm ntŭk kan bah Kruanh dak, Thủ tướng Chính phủ Phạm Minh Chính hŏ tâm nchră ma Thủ tướng Kyrgystan, Adylbek Kasimalyev. Tâm rnôk tâm nchră, Thủ tướng Chính phủ Phạm Minh Chính lah rjăp rơh khâl bah Thủ tướng Kyrgystan lah nau kan khlay, pơk luh nau tâm boh mhe vay ơm đah Việt Nam ndrel Kyrgystan, rƀŏng tât nau n’hao tâm boh kan nsum ăp ntil.

Bar Thủ tướng lah rjăp nau khlay bah nau mâp ăp gưl, ngăn lah gưl prêh, tâm ăp ntrong, kŏ kơt lah đah ăp N’gâng kan, ntŭk kan, n’gor, geh nau tâm mâp bar ding tâm ăp nau tâm nchră, rơh rƀŭn lam ntur neh, ngăn lah ta Liên hợp quốc, rƀŏng tât nau ndâk ăp ntrong tâm nchră gay ntrŭt dăng nau ƀư kan gưl prêh geh dơi. Thủ tướng Chính phủ Phạm Minh Chính lah rjăp, Việt Nam mra ƀư ntung nthoi gay Kyrgystan n’hao nau tâm boh đah ASEAN, ŭch Kyrgystan ƀư ueh nau kan tâm nthoi Việt Nam đah nkuăl Trung Á; đă Kyrgystan kơl an nau kan bah Việt Nam ndrel ASEAN tâm nau kan Biển Đông./.