Aơ lah ăp nău kan bôk năp tâm ăp rơh rƀŭn nchră gâl têh ASEAN tal 40,41 n’hanh ăp rơh rƀŭn nchră gâl têh geh tât. Thủ tướng Chính phủ Phạm Minh Chính ndrel đah nuĭh leo kan ăp dak ASEAN rnê nău leo ƀư ăp rơh tâm nchră, djăt nău tâm rgop bâh ndơn kan ăp rmôt, ăp mpôl kan êng êng. Ăp dak lah na nê̆ nău kan hăn ndrel bâh AIPA ndrel đah chính phủ ăp dak ASEAN tâm âk rach năm ba năp ntop âk ta trong mpŏng kan rdâk njêng âk dak ASEAN.

Ăp dak mbơh dăn âk trong kan n’hao săk rnglăy tâm rgop pah kan đah ntŭk kan hành pháp n’hanh lập pháp, tâm nĕ nsrôih uănh nđôi, doh rklaih ăp nău kŏ văk, nău nsrôih doh rklaih nău kan pháp luật, nta nău dơh nơih ƀư tĭng ăp nău tâm ton, bôk nău kan tâm kơl, ngăn lah ta ăp trong kan geh mât uănh âk aƀaơ kơt lah rgâl mhe rnoh mbrô, rgâl mhe ŭnh nar, tâm rdâng đah rgâl trôk nar mih sial...Ăp nuĭh leo kan lah na nê̆ mom ndăm geh nău kan dŭt khlăy tâm nău ntrôl tâm rgop kan n’hanh tâm rdâng đah nău ntul rlong nsum ta nkual, ntop mât uănh nchrăp nău kan let năp tay bâh âk dak ASEAN kan ndrel.