Kêng măng 24/10, tâm trôm ăp nău ƀư râng rƀŭn nchră gưl prêh ăp Nuĭh kruanh BRICS pơk hvi ta Liên bang Nga, Thủ tướng Chính phủ Phạm Minh Chính lĕ wơt Kruanh N’gâng kan Wăng sa Malaysia Rafizi Ramli. Thủ tướng Chính phủ mbah rhơn Malaysia dơn nău ƀư Kruanh Asean năm 2025; mĭn lah Việt Nam mbra rgop uĕh gay đăp mpăn lôch jêh bah Năm Asean.

Kruanh N’gâng kan Wăng sa Malaysia nkoch ŭch hao ngăch wăng sa têh bah Việt Nam tâm 10 năm bah năp. Pơng an lah aơ rnôk tâm di an Malaysia n’hanh Việt Nam n’hao kan ndrel, ngăn lah ta ntil nău mhe kơt rgâl ŭnh nar; nkra njêng ndơ điện tử; râng ăp trong nkra njêng n’hanh pă manh. Thủ tướng Chính phủ Phạm Minh Chính n’hanh Kruanh N’gâng kan Wăng sa Malaysia tâm nchră mpeh ăp nău nkual n’hanh lam ntŭr neh ndrel uănh, tâm nĕ geh nău Biển Đông; ngăn lah n’hao tâm rgop, tâm kơl ndrel ta ăp rƀŭn nchră ăp ding.