Ôi 27/2, Thủ tướng Chính phủ Phạm Minh Chính ƀư tơm rƀŭn nchră Rnâng kan Chính phủ pah kan đah doanh nghiệp Ngih dak đah bôk nău “Nău kan trong mkra rgop hao jêng 2 rnoh mrô n’hanh hun hao neh dak ngăch n’hanh nâp nâl”. Ntoh ngơi ta rƀŭn nchră, Thủ tướng Phạm Minh Chính lĕ ntĭm ăp nău nu nău lam ntŭr neh n’hanh tâm dak bah nĕ nkoch kloh nău kan bah doanh nghiệp ngih dak, tâm nĕ lah rjăp:

Ăp doanh nghiệp Ngih dak an rgop ntrôl jâng wăng sa ngăch nâp nâl ndơ̆ neh dak mpăr tâm năm tât; an rgâl nău mĭn, trong gĭt tât, trong mĭn, trong ƀư n’hanh an ntoh bah nău ngăn, an rgŏ jă soan dăng bah nuĭh ƀon lan gay ndrel lăp; an kơp uănh tay, ntop tay lôch jêh trong ƀư; an n’gluh ăp trong kơl gay jêng tơm prăk, gay tơm prăk dơi âk rlău 2, 3 tơ̆, ƀư jâng ntrôl, ƀư ntŭk nsing an he rgâl hao. Thủ tướng an gĭt, năm 2025 geh nkô̆ nău dŭt khlay, lah năm hao ngăch, rgâl mhe, nsrôih hao jêng GDP geh đêt ngăn 8%, jêng jâng, soan hao gay ăp năm bah năp tĭng hao jêng 2 rnoh mrô. Đah nău ƀư tơm n’hanh tơm prăk bah nơm Thủ tướng đă, ăp doanh nghiệp ngih dak an hao ngăch ndơ̆ neh dak hun hao ngăch n’hanh nâp nâl.