Ôi 5/2, Thủ tướng Phạm Minh Chính ƀư tơm rơh hop Chính phủ tât leh khay 1/2025. Tâm nchră Ban Chấp hành Trung ương Đảng khay 1/2025 hŏ n’glêh an âk trong nchrăp, trong kơl khlay mpeh dăp rgum, glêh tam nuĭh kan; rgâl n’hao rnoh tât hun hao năm 2025 tât 8% let lơ, nsrôih tât trong nchrăp 5 năm 2021-2025 n’hanh njêng jâng nsing nâp, rƀŏng tât hun hao bar mbrô tâm lvang năm 2026-2030.

Lah n’glôch jêh rơh hop, Thủ tướng Phạm Minh Chính hŏ nchŏng kloh ăp nău kan hŏ ƀư dơi, mô hŏ ƀư dơi tâm khay 1, nkô̆ n’hanh nău tă ơm gĭt kan. Tâm let năp tay, Thủ tướng đă, grêt dăch Nghị quyết bah Đảng, nău rđău đă bah Trung ương, Bộ Chính trị, ăp kruanh rđău kan n’gâng tơm, gay ƀư jêng ngăn ngăn trong nchrăp, trong tor luh tĭng ƀư bah tĭng gưl, tĭng n’gâng kan, tĭng n’gor. Ân geh nău nsrôih âk, dâk kan lĕ n’hâm suan ntơm bah bôk năp, khay bôk năm 2025. Nsing ta nău tă ơm gĭt mât bôk kan hŏ geh, ân ƀư dăng lơn, ƀư tơm nô nău lơn đŏng, dâk kan geh nău tam lơn đŏng, n’hao nău dơi kan nsum, lơn lah tâm nău nkra nkô̆ nău tâm ntêng lêng n’gâng kan, ntêng lêng nkual; lor nchrăp mbơh n’hanh dăn đă trong nkra ăp nkô̆ nău rlău nău dơi nkra.