Kêng măng 10/2, Thủ tướng Phạm Minh Chính ƀư tơm rơh hop tâl 11 Ban rđău đă n’glôch jêh nău tĭng ƀư Nghị quyết mbrô 18-NQ/TW bah Trung ương. Rơh hop rgum an nău rgop mpeh đề án dăp rgum nhih pah kan thanh tra glêh tam, yach ngăch, geh nău dơi, nău tam. Tâm  nê, mĭn uănh mpeh rnoh tât kan, nău way bah nău dăp rgum nhih pah kan thanh tra; ntrŏng năl nău kan, trong leo dăp rgum nuĭh kan; dăn đă dăp rgum nuĭh kan n’gâng kan thanh tra tĭng 2 gưl ta Trung ương n’hanh n’gor.

Lah n’glôch jêh rơh hop, Thủ tướng Phạm Minh Chính lah rjăp, nău dăp rgum nhih pah kan thanh tra ân ndơ̆ nău geh bah neh dak, bah ƀon lan dâk bôk năp; grêt dăch trong nchrăp, nău rđău đă bah Đảng n’hanh Ngih dak, đăp mpăn tât hŭch đêt nhih pah kan n’hanh biên chế, n’hao nău tam, nău dơi kan bah n’gâng kan thanh tra. Ndrel đah nê, nău dăp rgum nuĭh kan ân nkra bah ăp nău khoah, mpăng đêt, chong cheng, tâm trŭp tâm dăp rgum, nău kan bah ăp nhih pah kan thanh tra kơt aƀaơ. Thủ tướng đă Thanh tra Chính phủ, Bộ Nội vụ n’hanh nhih pah kan geh tât ndăn ngăch ƀư lôch jêh đề án hao rblang dăn Bộ Chính trị n’hanh Ban rđău đă Trung ương mĭn uănh n’hanh nchrăp hao rblang dăn Quốc hội lôch rnôk Bộ Chính trị hŏ an nău rgop.