Kêng măng 11/10, ta Nhih pah kan Chính phủ, Rnâng kan Chính phủ mâp măt nuĭh ntơh măt doanh nhân Việt Nam nkhêp geh nar Doanh nhân Việt Nam (13/10). Aƀaơ, Việt Nam hŏ geh bơi 900 rbăn doanh nghiệp dôl kan, nklăp 14,4 rbăn hợp tác xã n’hanh rlău  5 rkeh rnăk tăch rgâl. Ăp doanh nghiệp rgop rlău 60% GDP, nklăp 30% lĕ rngôch rnoh nuĭh kan dôl pah kan. Bah meng nău kan ƀư njêng tăch rgâl, rmôt doanh nhân way mpơl  nău dơn kan lam rêh jêng nsum đŏng, âk doanh nhân hŏ n’hanh dôl nsrôih râng ăp bôk nău kan jut jăng ji ngot, n’hŭch ach o, nkah gĭt n’hâm suan.

Lah ta rơh mâp măt, Thủ tướng Phạm Minh Chính hŏ njuăl nău ôp khâl, nkah gĭt, mbah rhơn dŭt uĕh lăng bah Tổng Bí thư Nguyễn Phú Trọng tât lĕ rngôch doanh nhân, doanh nghiệp Việt Nam. Thủ tướng Chính phủ lah rjăp hăn ndrel tay đah  mpôl doanh nghiệp. Đăp mpăn tay wăng sa têh, mât kân hao khlay ndơ, ntrŭt ntrôl hun hao, đăp mpăn tâm rlak têh bah jâng wăng sa. Rgâl uĕh tay ntŭk ntuh kơl tăch rgâl geh nău tâm ban, soih aih, kloh rvah; rơih ăp mpêr n’gar nking kol, quy định mpeh nău nkol tăch rgâl mô lăng khlay, n’hao nău dơi tâm rlong gưl neh dak, rgâl dơh glêh siƀŭt kan, rdâk  njêng jâng wăng sa mbrô, Chính phủ mbrô uĕh mhe, dêh bên đah nuĭh ƀon lan n’hanh doanh nghiệp.