Ôi 20/10 ta Ả Rập Xê út, Thủ tướng Chính phủ Phạm Minh Chính leo mpôl đại biểu Việt Nam râng n’hanh ntoh ngơi ta Rƀŭn nchră gưl prêh ASEAN-Hội đồng kan ndrel nkual Vịnh (kuăl lah GCC) 2023. Ta rƀŭn nchră, ăp Nuĭh kruanh mĭn lah uănh khlay tâm boh đah 2 rmôt kan nkual kơp bah rnôk ndâk njêng tâm boh năm 1990. ASEAN uănh lah prêh lĕ rngôch ăp dak kan ndrel GCC lĕ lăp Hiệp ước dăch đêp n’hanh kan ndrel Đông Nam Á, nkre rnê ăp Tiểu vương quốc Ả-rập Thống nhất (UAE) jêng kan ndrel tâm nchră tĭng ntil nău bah ASEAN kơp bah năm 2022.

Rƀŏng tâm rgŏ năp, Kruanh ăp dak ASEAN n’hanh GCC tâm ban ŭch mât tâm rgâl ƀa ƀơ, nâp nâl n’hanh lôch jêh ăp trong kan ndrel, nkre ntrôl dăng kan ndrel tâm ban, ndrel uĕh, uănh khlay kan ndrel nsum tâm ăp ntil nău wăng sa, tăch rgâl ntuh kơl, đăp mpăn pă manh nâp nâl, kan ndrel dak lêng, rnă njrăng ŭnh nar, ndơ sông sa, rdâng rgâl trôk nar... Rƀŭn nchră mbơh an nău mbơh nsum, lah ăp săk rnglăy tâm rgâl bah Kruanh Gưl prêh n’hanh n’gluh an ăp trong nchrŏng hun hao lơn tay tâm boh ASEAN-GCC tâm năm tât.