Nkhêp geh râng pơh lễ gưl têh Khóa 78 Đại hội đồng Liên hợp quốc n’hanh nău kan bar ding ta Hoa Kỳ, ôi 18/9 (tĭng mông ta ntŭk), ta nkual ƀon têh San Francisco, bang California, Thủ tướng Chính phủ Phạm Minh Chính râng “Rgum nchră tăch rgâl Việt Nam – Hoa Kỳ tâm boh tâm trong kan công nghệ, rgâl blău ƀư mhe” tă bah Bộ Kế hoạch n’hanh Đầu tư hŏ kan nsum ndrel đah Tổng Lãnh sự quán Việt Nam ta San Francisco n’hanh Hội đồng tăch rgâl Hoa Kỳ - ASEAN gay ƀư.

Ta rơh rgum nchră, ntơh măt ăp doanh nghiệp bar dak hŏ geh ăp rơh tâm ôp sŏng dăng  n’hanh ngăn ngăn mpeh tâm boh ntuh kơl, tâm nê rgum tâm trong kan công nghệ, rgâl mhe; ŭch rŏng râng tâm rnôk ndơ̆ rgâl mbrô bah Việt Nam. Đah nău mĭn “nuĭh suan dăng kơl nuĭh suan jê̆; bu mom kơl bu ranh; nuĭh geh ndrŏng, kơl nuĭh geh wăng sa đêt” n’hanh đah nău mĭn “nkêh an êng du ding nău kăl e, rƀŏng tât hăn let năp tay, nkrêp jĭr tay khap rmanh tâm lơh tâm su”, Thủ tướng Chính phủ ŭch rŏng nuĭh ƀon lan, doanh nghiệp Hoa Kỳ tât đah Việt Nam da dê gay uănh saơ nău rgâl bah Việt Nam; lah rjăp Chính phủ Việt Nam mbra pơk mpông wơt lĕ ma doanh nghiệp tât ntuh kơl tăch rgâl di pháp luật, đăp mpăn, nsĭt geh yor ma nău têh ndrŏng, kuâng dăng bah ăp dak, hơm răm, đăp mpăn bah nuĭh ƀon lan./.