Ôi 19/10, tĭng mông ta ntŭk, Thủ tướng Chính phủ Phạm Minh Chính râng n’hanh lah ta Rgum nchră wăng sa tăch rgâl Việt Nam - Saudi Arabia n’hanh uănh saơ Lễ ký ton ăp siƀŭt tâm boh đah doanh nghiệp bar dak. Ta rgum nchră, ăp doanh nghiệp hŏ djăt ăp kruanh rđău kan, ăp n’gâng kan nkoch mbơh mpeh săk geh tâm boh đah bar dak, trong kơl wăch rgum ntuh kơl bah ăp ding.

Ăp doanh nghiệp Saudi Arabia rnê âk ntŭk ntuh kơl, tăch rgâl nar lơn ma dơi rgâl uĕh ta Việt Nam; nkre joi gĭt mpeh trong dơh soih tâm boh ntuh kơl, buăt nthoi tăch rgâl, nkoch ăp nău dăn đă đah Chính phủ, ăp n’gâng kan bar dak n’hanh dăn đă ăp trong tâm boh na nê̆ đah ŭch rŏng njêng luh ăp rnoh khlay mhe n’hanh suan ntrôl hun hao mhe gay n’hao têh tâm boh wăng sa bar dak mpeh săk geh n’hanh lăp tâng jru tâm  let năp tay. Lah ta rơh tâm nchră, Thủ tướng Phạm Minh Chính nkoch kloh, Việt Nam mbra nta trong dơh an ăp nuĭh ntuh kơl wăng sa nsĭt geh nău tam, đăp mpăn, nâp dăng jŏ jong ta Việt Nam. Thủ tướng ŭch rŏng Việt Nam n’hanh Saudi Arabia mbra kan nsum lhăt, ndrel jêng ntung njŏ gay doanh nghiệp bar ding mô dơn ndrel râng ntŭk tăch rgâl nsum ma hôm pơk hvi lĕ ma nkual săk geh, têh hvi ASEAN n’hanh GCC.

Tâm nar 19/10, Thủ tướng Chính Phủ Phạm Minh Chính lĕ vơt kruanh n’gâng kan wăng sa n’hanh nchrăp nău kan Ả Rập Xê ut n’hanh kruanh n’gâng kan rnoh nuĭh kan n’hanh hun hao nău rêh jêng Ả rập Xê ut. Ta ăp rơh vơt, Thủ tướng Chính phủ Phạm Minh Chính rhơn ăp nău dơi geh têh kuăng bâh Ả Rập Xê ut tâm nău ƀư âk ding n’hanh hun hao ăp n’gâng kan wăng sa mô dŏng tơm pring, ntrôl dŏng khoa học công nghệ, rgâl mhe mĭn kan, an lor gay ma hun hao ueh nđir, nâp nâol, mpong tât ƀư tĭng nkô̆ mpŏng nău kan mpŏng uănh tât năm 2030. Lah na nê̆ nău tâm boh kan ndrel Việt Nam- Ả rập Xê ut dôl ta trong hun hao dŭt ueh n’hanh hôm nha geh âk nău dơi gay ma ntrôl tâm kơl. Thủ tướng chính phủ đă bar ding n’gâng kan wăng sa n’hao tâm rgop kan, tâm rgop leo ƀư ăp nău kan mbơh tơih tăch rgâl, ntuh kơl, tâm nĕ an lor ta ăp trong kan kơt ŭnh nar, tơm prăk ngân hàng, n’hao tâm kơl kan ta ăp trong kan mhe kơt tâm kơl pah kan jan sa, nkret njêng ntil ndơ Halal, rgâl mhe rnoh mbrô.