Ôi 26/2, tâm trôm bôk nău kan tâm nchră nău tâm boh let năp tay ASEAN 2025 hŏ ƀư rgum lam lĕ rngôch gưl têh đah nău tât râng bah Thủ tướng Chính phủ Phạm Minh Chính, Thủ tướng Malaysia Anwar Ibrahim, Thủ tướng New Zealand Christopher Luxon n’hanh Tổng thống Timor Leste Jose Ramos-Horta. Ta rơh hop rgum lam lĕ rngôch, Thủ tướng Phạm Minh Chính lah rjăp nău khlay bah nkô̆ nău nsrôih ndôr êng, ƀư tơm êng trong nchrăp kan đah ăp dak, ăp mpôl kan lam ntŭr neh, tâm nê geh Việt Nam n’hanh ASEAN.

Tĭng Thủ tướng Phạm Minh Chính, nkô̆ nău dja dơi mpơl ta nău tâm ban geh tâm boh dak bah dih nsing ta luật lệ gay njêng ntŭk soih aih an hun hao; nău hun hao mpeh wăng sa mô an geh plơ̆ rŭch bah kơi; njrăng n’gang neh dak, rnă njrăng dơi rdâk sơn nâp tâm di đah nô nău ngăn geh; đăp mpăn tŏng geh nău rêh jêng kon nuĭh gay mô an du hê nuĭh ndul êng bah kơi, mô n’groh nău tâm ban geh nău rêh gay hun hao wăng sa êng du ntil; mât ndray, ntik n’hao văn hóa, săk tơm. Lơn lah đah nău ntik n’hao nău khlay kan ƀư rgum tơm bah ASEAN Thủ tướng Phạm Minh Chính lah rjăp, ASEAN ân mpơl nău khlay kan rgum tơm tâm mpôl nơm, mpeh ăp nkô̆ nău geh tât tâm lơh, geh tât duh jêr, geh tât ăp nkô̆ nău lam ntŭr neh aƀaơ. Tĭng Thủ tướng Phạm Minh Chính, lor bôk năp ăp dak geh du trong nchrăp, dâk kan n’hanh nsĭt nău dơi tam đăp mpăn tâm boh n’hanh hun hao aƀaơ n’hanh lam ntŭr neh; tâl bar ASEAN ân rgum lăp tâm ban ăp nsĭt geh bah ăp dak tâm ASEAN gay rêng nău nđơr njêng suan ntrôl an ăp nkual êng êng, an ăp dak lam ntŭr neh.