Ta năp nĕ, bôk mông kêng măng (15/10) nkhêp di Lễ hội Sen Dolta năm 2023 bah rnoi mpôl Khmer Nam bộ, Thủ tướng Phạm Minh Chính tât khâl, mbah rhơn Hội Đoàn kết sư sãi rŏng dak n’gor Trà Vinh ta Chùa Ông Mẹt (hôm kuăl lah Chùa Kom Pong) ta phường 1, nkual ƀon têh Trà Vinh. Ntoh ngơi ta aơ, Thủ tướng Phạm Minh Chính mĭn lah tâm nău geh nsum bah neh dak geh nău rgop khlay bah sư sãi lah nsum, phái Nam tông Khmer lah êng.

Thủ tướng mĭn lah, Đảng, Ngih dak nsrôih mro yor nău hơm răm, uĕh lăng bah nuĭh ƀon lan lah nsum, mât njrăng nău dơi kon nuĭh, dah rŏng chroh rƀŭn, bah nuĭh ƀon lan; tâm nĕ uănh tât, mât uănh an ăp phật tử bah phái Nam tông Khmer lah êng. Ndơn  măt Kruanh Đảng, Ngih dak, Thủ tướng mbah rhơn sư sãi, phật tử, kônh wa rnoi nuĭh Khmer di rơh Lễ hội Sen Dolta năm 2023 n’hanh mpŏng kônh wa Khmer ƀư sa sâm geh, đăp mpăn, nău rêh nar lơ hơm răm, uĕh lăng; Thủ tướng đă Đảng bộ, n’gâng kan ƀon lan, Mặt trận Tổ quốc n’gor Trà Vinh mât uănh uĕh ngăn nău rêh drăp ndơ n’hanh nuih n’hâm an kônh wa ƀon lan.