Kêng măng 26/2, ta Ngih Chính phủ, Thủ tướng Phạm Minh Chính wơt Đại sứ Bỉ ta Việt Nam Karl Van Den Bossche tâm rgâl mpeh kan ndrel Việt Nam-Bỉ, ngăn lah tâm ntil nău wăng sa-tăch rgâl-ntuh kơl n’hanh ntop kơl mkra ăp naư khuch bah khih dak si deoxin ta Việt Nam.

Mĭn lah Việt Nam uănh Bỉ lah kan ndrel khlay tâm EU, Thủ tướng đă 2 ding nâp nâl nsing nơm tay chính trị tă bah n’hao tâm rgâl mpôl ăp gưl, ăp trong; n’hao săk rnglăy bah ăp trong kan ndrel ăp ding, tâm rgop rjăp ta ăp rƀŭn nchră, rmôt kan dak bah dih. Nkre 2 ding mât tay n’hanh ntrôl dăng kan ndrel ta ăp ntil nău way ơm kơt mât njrăng bri dak-rnă njrăng, văn hóa, ntĭm nti, nking n’gang rgâl trôk nar, pâl nđaih... n’hanh pơk hvi kan ndrel an ăp ntil nău têh mpeh văn hóa-công nghệ, chíp bán dẫn, ntung trong... Di rơh aơ, Thủ tướng nkah tay lah uĕh Hạ viện Bỉ lĕ mbơh an Nghị quyết mpeh ntop kơl nuĭh khih dak si deoxin Việt Nam (khay 10/2023), rgop ntrôl ntop kơl bah nsum mpôl lam ntŭr neh mpeh nău aơ.