Kêng măng ntri 5/3, Thủ tướng Chính phủ Phạm Minh Chính wơt Thứ trưởng Bộ Quốc phòng, Tổng Tham mưu trưởng Tahen ƀon lan Lào, Trung tướng Saichay Kommasith Leo mpôl ntơh măt tahen gưl têh Tahen ƀon lan Lào dôl khâl ngăn Việt Nam. Lah rjăp tâm boh tâm rnglăp têh Việt Nam - Lào geh nkô̆ khlay đah n’gâng kan rdâk njêng n’hanh mât njrăng neh dak bah bar dak, Thủ tướng an gĭt, Việt Nam way nkah nău ntop kơl bah Lào tâm rơh mât njrăng n’hanh hun hao neh dak, mbra ndrel Lào rlău jêr jŏt, ntul rlong ta năp măt n’hanh hun hao tay jŏ jong; way n’grŏ tĭng, nta trong dơh gay tâm boh đah Tahen bar dak nar lơn ma hun hao.

Thủ tướng Phạm Minh Chính dăn đă Tahen bar dak n’hao dăng tâm boh, nsŏng kơl geh nău tam đah kruanh gưl têh bar dak mpeh njrăng n’gang neh dak, rnă njrăng; an ƀư ngăn nău dơi geh bah Rơh tâm mâp kruanh rđău kan pe Đảng pe dak n’hanh pe Thủ tướng Campuchia-Lào-Việt Nam ta nkual ƀon têh Hồ Chí Minh khay 2 mhe aơ, rdâk nâp tay nău tâm rnglăp krêp dêh mpêt jĭr pe 3 dak; an ƀư ăp trong tâm n’glăp tâm boh dôl geh aƀaơ.