Thủ tướng: Rgum ntrŭt ntrôl ƀư ngăch trong cao tốc Hà Nội-Vientiane (Lào) Kêng măng 4/10, Thủ tướng Chính phủ Phạm Minh Chính wơt mpôl ntơh măt Thủ đô Vientiane dôl geh hăn khâl n’hanh pah kan ta Việt Nam. Ta rơh wơt, Thủ tướng Phạm Minh Chính nsing nơm trong hăn khâl, pah kan ta Hà Nội n’hanh du đêt n’gor bah mpôl hăn di tâm rnôk nkah ndray Nar rklaih luh Thủ đô Hà Nội (10/10) mbra rgop bun dăp an tâm boh kloh rsang, ntĭt leo lor n’hanh geh du nău mha êng lam ntŭr neh Việt Nam-Lào, tâm ban kơt tâm boh way ơm krêp dêh, uĕh lăng đah Thủ đô Hà Nội n’hanh Thủ đô Vientiane.

Thủ tướng lah rjăp Đảng, Ngih dak Việt Nam way an rong lor gay mât mbro n’hanh hun hao tâm boh geh du nău mha êng đah bar dak; way ŭch kơl, nta trong dơh an tâm boh đah bar Thủ đô Hà Nội n’hanh Vientiane ntik n’hao uĕh nău khlay kan têk leo tâm boh đah ăp n’gor bah bar dak. Thủ tướng dăn đă bar Thủ đô ndrel ăp nhih pah kan, ăp n’gor geh tât rgum, nsrôih ntrŭt ntrôl nău buăt nthoi đah Thủ đô Vientiane n’hanh Thủ đô Hà Nội ma trong cao tốc dŭt glêh ngăch, tâm ban kơt nthoi bar jâng wăng sa, buăt nthoi đah Vientiane n’hanh ăp n’gor bah Lào đah ăp n’gor bah Việt Nam ma trong loih, ndrâm dak lêng…