Nthoi tay bôk nău kan pah kan ta Quảng Trị, kêng măng 16/10, Tổng Bí thư, Kruanh dak Tô Lâm ndrel mpôl pah kan Trung ương lĕ pah kan đah Ban Thường vụ N’gor ủy Quảng Trị mpeh nău mbơh ƀư tĭng Nghị quyết Đại hội Đảng ăp gưl hăn ndrel đah hun hao wăng sa, rêh jêng, đăp mpăn bri dak, rnă njrăng, ndâk njêng Đảng n’hanh trong chính trị. Ntoh ngơi ta rơh pah kan, Tổng Bí thư, Kruanh dak Tô Lâm uănh lah prêh Đảng bộ, n’gâng kan n’gor Quảng Trị lĕ tâm rnglăp, tâm ban ŭch, dŭt n’hâm mbơh ƀư nghị quyết Đại hội 13 bah Đảng, n’hanh Nghị quyết đại hội Đảng bộ n’gor rơh tal 17, lĕ an âk nghị quyết chuyên đề, n’glôn jêh, ntĭm đă, ăp bôk nău kan ƀư, trong chrăp mbơh ƀư...

Quảng Trị geh ngăch hao jêng wăng sa ngăch lơn rĭng geh bah lam dak; n’hâm soan tâm rlong bah jâng wăng sa dơi rgâl; nu nău wăch rgum ntuh kơl, sŏk an tơm prăk n’hanh nta an nău kan nar lơ hao, ntung trong ngih wâl nar lơ dơi ntuh kơl rĭng n’hanh lôch jêh, ngăn lah ntung trong tâm boăt nthoi. Văn hóa, ntĭm nti, dak si dơi n’gor uănh n’hanh rgum prăk ntuh kơl, trong kan rnă njrăng rêh jêng, mĭn uănh nuĭh ach o, nuĭh mô lap tâm nău rêh jêng dơi uănh khlay; ƀư tĭng uĕh trong kan rnoi nuĭh, chroh rƀŭn, tâm rnglăp rnoi nuĭh.