Kêng măng 27/9, ta Nhih pah kan Trung ương Đảng, Tổng Bí thư Nguyễn Phú Trọng hŏ wơt Mpôl ntơh măt gưl têh Đảng, Ngih dak Cu-ba tă bah Kruanh Quốc hội Cu-ba leo hăn khâl Việt Nam n’hanh râng Lễ nkah ndray 50 năm hăn khâl bah Kruanh Phidelcastro tât nkual rklaih luh n’gor Quảng Trị, miền Nam Việt Nam (9/1973 - 9/2023).

Tổng Bí thư Nguyễn Phú Trọng rhơn rnê Kruanh Quốc hội Cu-ba ntơh măt kruanh rđău kan Đảng, Ngih dak Cu-ba, tât râng Lễ nkah ndray rơh dja, mpơl nău uănh khlay bah Đảng, Ngih dak Cu-ba oh nô đah tâm boh tâm rnglăp mha êng Việt Nam - Cu-ba. 

Tổng Bí thư Nguyễn Phú Trọng lah rjăp Việt Nam way uănh khlay, mât ndray n’hanh nsrôih ƀư jru hvi  lơn tâm boh tâm rnglăp  way ơm mha êng n’hanh tâm boh lam lĕ rngôch Việt Nam - Cu-ba n’hanh nău mĭn mô rgâl way tâm rnglăp, ŭch kơl Cu-ba, rlăch dun n’hanh ôp kuăl dŭt bah trong mpă wêl, mpăng lơh Cu-ba. Bar kruanh rđău kan tâm ban ŭch rdâk tay njâng nsing tâm boh chính trị đah bar Đảng, ƀư trong rƀŏng an hun hao tâm boh đah bar dak, dăn đă ăp n’gâng kan, ăp mpôl kan n’hanh ăp n’gor bar dak tâm boh lhăt, an ƀư ngăch ngăr ăp nău tâm ton gưl têh, bôk nău kan, hiệp định hŏ ký ton gay nta trong hun hao mhe tâm boh wăng sa, tăch rgâl, ntuh kơl, tuch tăm, ntĭm nti, công nghệ sinh học, dak si...