Nkhêp nkah ndray 10 năm njêng Rmôt đại biểu Quốc hội mom Việt Nam (ntơm bah năm 2015-2025), kêng măng 24/6, ta Nhih pah kan Trung ương Đảng, Tổng Bí thư Tô Lâm hŏ mâp măt Rmôt đại biểu Quốc hội mom khóa XV. Tổng Bí thư lah rjăp, Đại hội Đảng ăp gưl hăn tât Đại hội đại biểu lam dak tâl XIV bah Đảng, lah nău dơn kan geh nkô̆ khlay têh jong, nkre gay n’glôch jêh nău ngăn geh, kơi ntop lý luận, nkre gay sơch ăp cán bộ tŏng ring tam – tŏng nău têh blău – hăr blău an rơh mhe.

Rmôt đại biểu Quốc hội mom ân rgop tay tâm ăp trong nchrăp siƀŭt dăn đă, uănh năl ngăn geh tâm dâng n’hanh dăn đă ăp trong đăt ndal mpeh trong hun hao, mât bôk kan nsum, hun hao nâp dăng, rnă njrăng mô tă way geh. Gay tĭng ƀư dơi nău kan têh khlay bah he, Tổng Bí thư lah rjăp, ăp đại biểu Quốc hội mom ân way sol êng săk nơm, tiăr nti, ôp joi n’hanh n’groh an mô gŭ rlu. Ăp đại biểu Quốc hội mom ân du trong tĭng nău mĭn cách mạng, du nuih n’hâm đah Đảng, đah neh dak n’hanh ƀon lan; ntik n’hao nău khlay kan, ring lam nuih n’hâm rgâl mhe, mô rgoh n’gơ bah năp jêr jŏt, mô hưp nău geh êng an nơm, mô ƀư roh săk nơm bah năp nău nkơnh n’hơ mô lah săk lư; nănh mĭn, nănh ƀư, nănh rgâl mhe, nănh dơn nău kan.