Nar 27/2, Tổng Bí thư Tô Lâm ƀư tơm rơh hop Rnâng kan ăp Tiểu ban nchrăp Đại hội XIV bah Đảng.Tâm bah ri aơ nơh, Rnâng kan ăp Tiểu ban hŏ ra uănh tay, rgum lĕ rngôch gay mĭn uănh gay ntop, n’glăp tâm ăp trong nchrăp hao rblang dăn Đại hội XIV bah Đảng, tâm nê geh nkô̆ mpeh nău ŭch tât hun hao wăng sa lvang năm 2026-2030 rƀŏng tât geh 2 mbrô; ndrel đah nê lah du đêt nkô̆ khlay êng ƀa ƀă mpeh njrăng n’gang neh dak, rnă njrăng, tâm boh dak bah dih; ăp nkô̆ nău mpeh pháp luật, n’hanh pah kan njrăng n’gang sa khâm, mpŭng lir.

N’glôch jêh rơh hop, Tổng Bí thư Tô Lâm hŏ tâm ban ŭch đah nău dăn đă bah Rnâng kan ăp Tiểu ban, nkre njrăng đă mpeh nkrum lam rgum djăt ăp nău rgop ta rơh hop gay rgâl nkra n’glăp, kơi ntop ăp nău nchrăp mbơh tĭng trong rƀŏng rtŭt glêh. Tổng Bí thư đă, ăp nuĭh mbơh ân nchih tĭng trong rƀŏng dâk kan n’hanh an ƀư tâm ngăn ngăn gay ăp rơh kơn ƀon lan, cán bộ đảng viên saơ kloh nău ŭch lah geh ntŭk nsing n’hanh tĭng ƀư dơi. Tổng Bí thư dăn đă, ăp trong nchrăp siƀŭt mbơh ân uănh năl di ngăn, geh ăp trong nkra gay an ƀư di, mô hĭng ntơr dơm nău dơi yơn mô plơ̆ rŭch đŏng.