Ôi nđaơ (4/2) ta Ngih Trung ương Đảng, Tổng Bí thư Tô Lâm ƀư tơm rơh rƀŭn Ban Bí thư, uănh lah nu nău mbơh ƀư Ntĭm đă mrô 40 bah Ban Bí thư mpeh nău ƀư Tết Ất Tỵ năm 2025; ntĭm rđău du đêt nău kan khlay bah Trung ương, ăp gưl ủy tâm năm tât. N’glôn jêh Rƀŭn nchră, đồng chí Tổng Bí thư Tô Lâm rnê, uănh lah prêh ăp gưl, ăp nău kan, ăp ngih pah kan, ntŭk kan, n’gor lĕ mât uănh, mbơh ƀư rjăp, geh săk rnglăy Ntĭm đă mrô 40 mpeh ƀư Tết Nguyên đán Ất Tỵ 2025.

Mpeh nău kan khlay năm tât, ntơm tâm ban ŭch đah 09 rmôt nău kan lĕ n’gluh an, đồng chí Tổng Bí thư lah rjăp đă ăp ngih pah kan, ntŭk kan, n’gor ntơm lăp nău kan jêh rlu Tết, mô an geh nu nău sa Tết jŏ jong, thơ tha nău kan, rgum jêh di ngăch ăp nău kan bah khay 2/2025 n’hanh 3 khay 2025; ƀư ăp lễ hội bôk năm đăp mpăn, ntêm nkrem, mkra rjăp ăp nău ƀư rlăm, rgâl săk. Nchrăp uĕh ăp nkô̆ nău rơh rƀŭn Quốc hội khay 2/2025, ngăn lah ăp nkô̆ nău geh tât dăp rmôt kan ƀĭt joet n’hanh dôh rklaih jêr jŏt, wăk kol mpeh trong ƀư. Nsrôih ƀư dŭt n’hâm ăp nău ntrŭnh, mkra rjăp nău rƀŏng hao jêng GDP rlău 8% năm 2025, nta an hao jêng 2 mrô tâm lvang 2026-2030.