Măng nđaơ (4/2), ta Ngih Trung ương Đảng, Tổng Bí thư Tô Lâm lĕ điện tâm nchră đah Bí thư bôk năp Đảng Cộng sản Cuba, Kruanh dak Cộng hòa Cuba Miguel Diaz-Canel. Bí thư bôk năp, Kruanh dak Cuba uănh lah prêh ăp nău geh bah Việt Nam, đah nău rđău bah Đảng Cộng sản Việt Nam tâm ndâk njêng n’hanh hun hao neh dak, uănh nĕ lah nău ang an ntrong leo cách mạng, cộng sản lam ntŭr neh, nkre nkoch nău ryơk khlay nău tâm rnglăp n’hanh nău kơl du nuih n’hâm bah Việt Nam an Cuba ta lôch ăp năm bah năp.

Tổng Bí thư Tô Lâm mĭn lah nău mĭn êng nơm bah Việt Nam kơl ăp nghị quyết bah Đại hội đồng Liên hợp quốc tâm nău đă lôch mô an dun Cuba. Rƀŏng tât nkah gĭt 65 năm ndâk njêng tâm boh tâm rnglăp Việt Nam-Cuba (2/12/1960-2/12/2025), Kruanh 2 Đảng, 2 dak lĕ nkoch mpeh nu nău ăp Đảng, ăp dak; mĭn lah tay nău khlay bah tâm boh dăch dêh têh đah Việt Nam n’hanh Cuba, uănh lĕ lah drăp ndơ khlay 2 ding an nsrôih nâp nâl n’hanh hun hao. 2 ding tâm ban ŭch ntrôl mbơh ƀư âk nău kan ndrel gay n’hao nsing nơm chính trị; mbơh ƀư săk rnglăy ăp tâm ton gưl prêh dơi geh tâm rơh khâl têh bah Tổng Bí thư, Kruanh dak Tô Lâm tât Cuba khay 9/2024; dŭt n’hâm ƀư ăp nău kan nkah gĭt têh, tâm nđŭr nuĭh ƀon lan tâm năm dăch dêh Việt Nam-Cuba 2025.