Tâm mông nar rhơn Đảng, rhơn Tết Nguyên Đán Ất Tỵ 2025 n’hanh nkah gĭt 95 năm Nar ndâk njêng Đảng Cộng sản Việt Nam (3/2/1930-3/2/2025), Tổng Bí thư Tô Lâm lĕ râng n’hanh rgŏ jă tết tăm tơm si mro mrăng nkah gĭt Wa Hồ ta Ninh Bình. Tổng Bí thư Tô Lâm an gĭt, tă aơ rlău 65 năm, nar 28/11/1959, Kruanh Hồ Chí Minh nchih “Tết tăm tơm si”, nchih ta báo Nhân dân, kuăl jă ăp nuĭh, ăp jay, ăp rmôt, ƀon lan ndrel nsrôih tâm rlong tăm, mât chăm tơm si n’hanh rblang nkô̆ nău têh n’hanh nău geh ngăn ngên bah nău tăm tơm si, jêng bri.

Tổng Bí thư mĭn lah, tât aƀaơ ăp năm mhe tât, “Tết tăm tơm si” lĕ ngăn ngên jêng nar rgum bah lam Đảng, lam ƀon lan n’hanh lam tahen he. Aơ mô knŭng lah du nău ƀư geh nkô̆ way ơm têh hvi, ma hôm nău ƀư na nê̆, ngăn ngên gay ƀư tĭng nău ton têh bah Việt Nam ta năp nău ƀư lam ntŭr neh n’hanh mbơh ƀư nău kan lam dak mpeh rgâl trôk nar, rƀŏng tât du play neh uĕh nđik, yor nău hun hao ngăch n’hanh nâp nâl bah neh dak. Rơh aơ, Tổng Bí thư đă, ăp n’gâng kan, nău kan, lơn lah N’gâng kan tài nguyên n’hanh Môi trường, N’gâng kan Tuch tăm mât rong n’hanh hun hao ƀon lan tâm rgop, ntrôl dăng trong kan groi nđôi, ntĭm rđău ăp ntŭk ƀư tĭng geh săk rnglăy ntrong leo tăm tơm si.