Nar 10/2, ta Hải Dương, nkhêp geh bôk năm mhe, Tổng Bí thư Tô Lâm, Bí thư Quân uỷ Trung ương tât khâl n’hanh pah kan đah Lữ đoàn tên lửa 490, Binh chủng Pháo binh, Bộ Quốc phòng. Tổng Bí thư Tô Lâm rnê Lữ đoàn tên lửa 490 tâm bah ri aơ hŏ ƀư jăp mbro pah kan ntĭm nti chính trị rƀŏng nău mĭn, rdâk njêng nuih n’hâm tâm rnglăp, dơn ngoăy, n’hao nău gĭt êng mpeh nău dơn kan n’hanh nău nsrôih an cán bộ, tahen bah Lữ đoàn.

Gay lôch jêh uĕh nău kan dơi jao tâm rơh mhe, Tổng Bí thư dăn đă, Lữ đoàn ân đăm jru tay Nghị quyết Đại hội Đảng lam dak tâl XIII, Nghị quyết Đại hội Đảng bộ Tahen tâl XI, ăp nghị quyết, nău ntrŭnh bah Ban Chấp hành Trung ương, Bộ Chính trị, Quân ủy Trung ương, Bộ Quốc phòng gay ƀư jêng ngăn ngăn n’hanh tĭng ƀư geh nău tam Binh chủng Pháo binh n’hanh Lữ đoàn 490. Nkhêp geh rnôk dja, Tổng Bí thư đă, ân mât chăm mbro rdâk njêng Đảng bộ Lữ đoàn wat jêh uĕh nău kan n’hanh lôch jêh ngăch prăk nău kan, tĭng ƀư jăp nău kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh, Rơh rgŏ jă ntik n’hao nău way ơm, an lĕ nău gĭt blău, di săk ntơ “Tahen wa Hồ” rơh mhe.