Kêng măng nar 26/02, ta Nhih pah kan Trung ương Đảng, Tổng Bí thư Tô Lâm hŏ wơt Thủ tướng New Zealand Christopher Luxon – Kruanh Đảng Quốc gia New Zealand, nkhêp geh Thủ tướng khâl ngăn Việt Nam n’hanh râng rgum nchră tâm boh let năp tay ASEAN tâl 2. Ta rơh wơt, Tổng Bí thư Tô Lâm di nuih n’hâm saơ nău hun hao nsing nơm bah tâm boh chính trị Việt Nam - New Zealand, lah jâng nsing gay bar dak n’hao dăng tâm boh lam lĕ rngôch ăp trong kan.

Tổng Bí thư rnê âk lôch jêh tâm nchră đah bar Thủ tướng, lơn  lah n’gluh nău mbơh nsum  n’hao têh tâm boh Việt Nam - New Zealand hao tâm boh têh jong lam lĕ rngôch, mpơl nău hun hao đăt ndal n’hanh nsing nơm jru đah bar dak, njêng jâng nsing nâp dăng n’hao tâm boh bar dak lăp tâm rơh hun hao mhe. Bar kruanh rđău kan tâm ban ŭch mpeh ăp trong rƀŏng hun hao tâm boh tâm rơh mhe; nsing nơm tâm boh têh jong lam lĕ rngôch mhe nsĭt tay nău geh nsum têh kuâng, rgop tâm nău đăp mpăn, hun hao bah nkual n’hanh lam ntŭr neh.