Yuh Trần Thị Bình, tâm xã n’har bri Ia Dom, nkuăl Đức Cơ, n’gor Gia Lai geh lăp kan ƀư công nhân cao su Đội 2 Công ty 72, Binh đoàn 15 rlau 10 năm ma aơ. Yuh mbơh, đah rnoh geh rlau 7 rkeh prăk tâm di khay, jêh âk năm, rnăk yuh hŏ geh prăk rvăt tay mir, tăm tay byăp jêh mông lôch kan, ntơm bah nê geh ndơ sa, ndơ têm, kon geh hăn nti. Ndri ma, yuh mrô gĭt kloh nau dơi bah công nhân tâm rmôt kan văng sa, neh dak:

            ‘Lah công nhân bah rmôt kan ƀư nau kan tâm nkuăl n’har bri, geh nŭih nơm mô mơng lăp tâm mir, hên mbơh ma rmôt kan ndrel rmôt dân quân, gay đăp mpăn nau kan ân nơm pah kan ndrel mât nâp nkuăl n’har bri”.

            Hôm tâm n’har bri Chư Prông, Gia Lai, rnơm geh lăp kan ƀư công nhân bah rmôt 5, Trung đoàn 710, ma nau rêh rnăk nô Kpuih Kớt, hŏ geh rgâl. Nô mbơh, ur sai nô mhe luh gŭ êng, neh tuch tăm mô âk, mô jêng, nau rêh jêr ngăn. Ntơm năm 2022, lĕ bar hê ur sai nô Kớt lăp kan công nhân cao su, nau rêh rnăk vâl ueh ngăn:

            ‘Rnôk aơ 2 hê ur sai kŏ geh mbơm oi đŏng. Bôk năp, rnôk lăp ƀư công nhân, rmôt kan hŏ pơk trong ân 2 hê ur sai. Rnôk aơ, rnăk hên geh tay prăk, rnôk ji kuet ri geh quân y. Rơh tât, 2 hê ur sai nsôih pah kan ueh lơn, kơt tĭng nau tă blau kan bah cong nhân ơm, blau nau kan gay ma n’hao nau geh dơi ân nơm”.

            Jong tâm 3 xã n’har bri, Ia Pnôn, Ia Nan, Ia Dom, du gưl bah xã Ia Kla ndrel nkuăl têh Chư Ty (nkuăl Đức Cơ) bri cao su bah công ty TNHH du ntŭk kan 72, Binh đoàn 15 dôl tâm dăch ma 18 ntŭk ƀon lan gŭ bah n’gor Gia Lai. Mpeh đah ri n’har bri, công ty koư geh rmôt tăm cao su tâm 2 nkuăl Oyadav ndrel Bo Keo, n’gor Rattanakiri, dak Campuchia. Ndrel ma nau rgâl mhe, n’hao săk tam mir tăm, rmôt kan ƀư âk nau kơl an, khám săm ji, pă dak si, kơl tâm rnglăp rnoi Yoan ndrel rnoi mpôl đê̆ ndrel tâm kơl hun hao văng sa. Thiếu tá Phan Tiến Toàn, Groi Giám đốc công ty 72, Binh đoàn 15 mbơh:

            ‘Lah rmôt kan tâm 3 xã n’har bri, ăp khay, rmôt kan đă nŭih hăn râng tâm rgop mât đăp mpăn chính trị, rnă njrăng tâm ƀon lan tâm nkuăl, ƀư ueh nau kan mât ndơ nơm geh, nkre tâm rgop nsum ma rmôt kan tâm ntŭk mêt uănh nau gŭ âm. Ăp khay rmôt kan hôm râng mât trong n’har bri, n’gâng n’har bri. Ăp năm, nau kan geh ăp gưl uỷ, n’gâng kan tâm nkuăl nchră rnê”.

            Đah nau kan “Binh đoàn tâm rgop ma n’gor, nkuăl; Công ty tâm rgop ma nkual, xã; rmôt kan ê kra tâm rgop ma ƀon lan; rnăk rnoi Yoan tâm rgop ma rnăk rnoi mpôl đê̆”, rnôk aơ Binh đoàn 15 dôl ƀư nau kan văng sa geh nsum ma nau kan mât n’har bri jong rlau 250 km mpeh ba lơ Tây Nguyên, tâm dăch ma 2 dak băl Lào ndrel Campuchia. Ăp năm rlau aơ, rmôt kan mro uănh khlay nau nti kan, jao nau kan mât rong, tuch ta kơl an kon ntil, tơm prăk...kơl an nŭih rnoi mpôl đê̆ hun hao rnăk vâl. Ntơm bah nê, âk rnăk công nhân rnoi mpôl đê̆ rklaih ach o, hao sâm geh, rgop nau ndrel n’gâng kan ndâk njêng ƀon lan mhe tâm nkuăl n’har bri.

            Thiếu tướng Hoàng Văn Sỹ, Groi Bí thư Đảng uỷ, Tư lệnh Binh đoàn 15 mbơh, Binh đoàn rnôk aơ geh rlau 15 rbăn công nhân, âk ngăn rnoi mpôl đê̆. Năm 2022, nau geh du hê nŭih kan geh 8 rkeh/khay. Nau rêh bah ƀon lan, nŭih pah kan tâm nkuăl n’har bri geh n’hao, nau văng sa, neh dak mât nâp:

            ‘Nau tâm rnglăp đah ăp rnoi, tâm n’ur văn hoá mhe tâm nsum mpôl lơn ma prêh, nuih n’hâm tâm rnglăp đah ƀon lan ndrel cán bộ công nhân bah binh đoàn ri mro tâm dăch ndrel nâp nâl. Ngăn lah đah nŭih rnoi mpôl đê̆ geh nau dơi lơn mpeh nau mât nkuăl n’har bri, năn saơ ăp nau kan tât mô ueh, mbơh năn tâm rơh rlau aơ, nê lah phung hên hŏ tâm rgop ma nkuăl ndrle gưl kan ba lơ, năn rklaih nau tât jêr”.

            Đah ăp nau ntrŭnh tâm di, nau kan tâm ban nuih n’hâm ƀon lan, ăp trong bri cao su hŏ rgop nau njêng nau ƀư nâp ndrih tâm njok trong n’har bri mpeh ba lơ nkuăl Tây Nguyên./.