Bol ma ăp năm roh huach ntơm bah 40 tât 50 rmen prăk gay mât nkra yơn trong QL27 gâl hăn rlău n’gor Lâm Đồng kâng n’har đah n’gor Dak Lak way tâm nô nău jŭr djơh hô. Tĭng nău dăn đă bah n’gor Lâm Đồng, Bộ Giao thông vận tải hŏ ŭch trong nchrăp ntuh kơl pơk hvi tay trong QL27 đah rnoh prăk 1.400 rmen prăk yơn tât aƀaơ nha mô hŏ dơi tâm pă tơm prăk ƀư.

Rlău jât năm aơ, wa Ka Joen, ta xã Liêng Srônh, nkuâl Đam Rông (Lâm Đồng) saơ dŭt âk tơ̆ nkra lĭr măt trong QL27 hăn rhot bah năp mpông jay he. Trong mhe nkra lôch bar pe khay plôk djơh tay, ntoh âk ntu hŭk hang dak. Nău ngăn geh dja lâp tay âk tơ̆ ƀư ntung trong rsong hăn bah nuĭh ƀon lan tâm nkual geh tât khuch hô.

“Trôk mih ri dak sor hoch lêng lang, păng băm jru tâm ban ma n’glău dak, mô saơ trong hăn. Hôm bri duh nar ri n’huk ngo, krit djơh ngăn”.

Âk gâl trong QL27 geh tâm ban kơt nê đŏng. Măt trong nkra  mbro yơn ngăch geh njot hăch ƀư trong rsong hăn jêr jŏt đŏng. Wa Đoàn Văn Vĩnh, ta xã Đạ Rsal, nkuâl Đam Rông (Lâm Đồng) lah:

“Lơn âk ƀư bah năp khuch bah kơi. Rnôk mih ndeh rdeng ndơ rsong hăn ri dak bŏk mprănh, nuĭh hăn trong rsêng rsăng srok tŭp ta brŏng dak. Măng ngo druh ndăm nchuăt ndeh mƀor ngăch, der ndeh rdeng ndơ, der ntu hŭk jêng tât prah ndeh dŭt âk”.  

Trong QL27 lah trong me nthoi đah 2 n’gor Lâm Đồng n’hanh Dak Lak, đah lĕ rngôch rnoh jong rlău 200km, dơi ntuh kơl tĭng  gâl n’hanh n’glăp dŏng tâm năm 1998. Tĭng wa Nguyễn Văn Gia, Giám đốc Sở Giao thông vận tải n’gor Lâm Đồng, tơm prăk mât nkra trong dja tă bah Bộ Giao thông vận tải kơl, đah prăk nkra ăp năm ntơm bah 40 tât 50 rmen prăk/năm tŏng gay n’gor nkra ntơm bah 8 tât 10km/năm. Yor nău nkra trong nchah nchrai, đêt jê̆ jêng trong geh khuch mbro, jŭr djơh.  

“Đah prăk tâm pă kơt nê̆ ri mô tŏng đah nău ŭch geh nkra, jêng tât nău gâl dja nkra lôch ri gâl êng hŏ geh khuch. N’gor hŏ dăn đă dŭt jŏ hôm, n’hanh tâm năm 2010 ri  Bộ Giao thông vận tải hŏ geh nău n’glêh an trong nchrăp ntuh kơl gâl trong hăn dja đah prăk ƀư nklăp 1.400 rmen prăk. Yơn lah, ntơm bah nê tât aƀaơ, n’gor geh nău dăn đă mbro ma âk trong ƀư, Bộ Giao thông vận tải geh nău ơh dŭt âk tơ̆ lah mô hŏ dơi tâm rlak tơm prăk gay ntuh kơl trong dja”.

UBND n’gor Lâm Đồng hŏ joi geh âk trong nkra, tâm nê geh nău dăn đă nta trong dơh gay Lâm Đồng đor lor prăk gay ƀư. Yơn lah, tĭng wa Phạm S, Groi kruanh UBND n’gor Lâm Đồng, tă bah nău dja mô hŏ tă geh bah ntơm nơh jêng gay tĭng ƀư lah dŭt jêr jŏt.

Trong QL27 hăn rlău n’gor Lâm Đồng lah dŭt khuch djơh tâm 128 quốc lộ bah Việt Nam ma 14 năm aơ mô hŏ dơi ntuh kơl nkra uĕh tay. Mhe aơ nơh Groi Thủ tướng Trần Lưu Quang lăp ri Kruanh UBND n’gor Lâm Đồng hŏ dăn đă tay na nê̆ đŏng, n’hanh nău dăn đă dja mpôl hên mĭn lah tâm di ngăn. Tâm rnôk tơm ndơ jêr jŏt mô tŏng tâm pă an ăp ntŭk kan tơm khlay gưl neh dak ân geh nău tâm ban ŭch bah Groi Thủ tướng ŭch jao an Bộ Giao thông vận tải. Bộ Giao thông vận tải mbra geh siƀŭt ơh mô rlak dơi tơm prăk n’hanh dăn đă Lâm Đồng đor lor gay ƀư. Yơn lah, aơ lah nkô̆ nău mô hŏ tă geh yor kơt nê̆ bol hŏ geh nău dăn đă yơn nklăp mbra dŭt jêr”.

Aƀaơ ăp năm, ngân sách ngih dak dŏng âk prăk rmen gay ƀư nkra, mât uĕh trong QL27 gâl hăn rlău n’gor Lâm Đồng yơn trong nha hôm jŭr djơh hô đŏng. Ngăn geh dja ƀư dŭt jêr jŏt tâm nău rsong hăn, khuch têh tât hun hao wăng sa- rêh jêng kon nuĭh bah Lâm Đồng n’hanh nkual Tây Nguyên./.